Chega o último Tres en Raia Boas Mans Fisioterapia da fase regular na Terceira Futgal. A derradeira xornada tivo máis emoción nun grupo sur no que faltaba por decidir a segunda praza de ascenso directo. O Rubián sacou os tres puntos fronte ao Incio e xogará en Segunda Futgal, deixando ao Taboada B na terceira posición. A Piringalla ocupará o último dos postos de play off.

No grupo norte quedaba por decidir a sexta praza pola que pelexaban Rioaveso e Pol B. Os vilalbeses venceron ao Cazás e xogarán a promoción. O Mondoñedo rematou a liga invicto tras derrotar no Viñas da Veiga ao Catro Roldas, nun choque entre ascendidos.

GRUPO NORTE

O Mondoñedo vence ao Catro Roldas e non estrea o casilleiro de derrotas (2-1). Temporada pra enmarcar do cadro mindoniense, que rematou cun ascenso e sen coñecer a derrota e que foi agasallado polo Catro Roldas co tradicional pasillo. Nun encontro no que ámbolos conxuntos partían co obxectivo cumprido, o encontro foi intenso e competido. O dominio foi alterno, aínda que sempre o Mondoñedo foi quen levou máis a iniciativa do xogo. Javi abriu o marcador logo dunha boa combinación e o Catro Roldas igualou ao convertir Samu unha pena máxima. No segundo tempo o Catro Roldas buscou xerar perigo á contra e o Mondoñedo chegou á portería dun inspirado Carmelo con certo perigo. Malia todo o Mondoñedo tivo que agardar ao desconto para facerse coa vitoria con outro gol do pichichi Javi.

O Pol B queda sen o premio do play off tras igualar no Pichón fronte ao Muimenta (1-1). Encontro no que poñía moito máis en xogo o cadro visitante. Os de Luis Romay precisaban un triunfo para optar a poder xogar a promoción de ascenso e saíron ao campo propoñendo un fútbol combinativo que o Muimenta logrou dificultar cunha boa presión. Aínda así o filial contou con algunha ocasión de gol que non foron quen de concretar. No segundo tempo o Muimenta baixou un pouco a presión e logrou adiantarse tras varios despexes errados dos visitantes que culminou un Nacho que todos os goles que marcou na competición o fixo diante do Pol B. Os de Luis Romay lograron empatar cun tanto de Kevin e buscaron o gol da vitoria con certa precipitación no tramo final.

O Rioaveso vence en Paraños ao Cazás e logra o pase á promoción de ascenso (3-1). O cadro local saiu ao campo disposto a certificar o seu pase ao play off e foi quen de adiantarse axiña cun tanto de Javi Cabarcos que lanzou desde a frontal e superou a un desacertado Fernando. A partir de aí o Cazás foi mellor. Dominou o centro do campo e gozou dalgunha oportunidade. Os xermadinos lograron o empate cun bo gol de Mateo Rouco e os seus puideron ir por diante no tempo de lecer. A segunda metade comezou cun arreón local. Javi Cabarcos aproveitou a saída de Fernando para deixarlle en bandexa o gol a Noé González. Co paso dos minutos as forzas foron a menos, pero o Cazás aínda tivo algunha opción de empatar. Na recta final sentenciou David Piñeiro cun lanzamento desde campo de seu que sorprendeu ao gardameta Fernando.

Roupar e Abadín igualan nun encontro sen nada en xogo (2-2). Comezou mellor o Roupar que foi quen de xerar varias ocasións, principalmente nas botas de Paco, quen marcou o primeiro tanto do partido. O Abadín xerou perigo a balón parado e nun rexeite tras un saque de esquina o colexiado indicou penalti, que transformou o debutante Tucho, que fichou no Abadín procedente do Lourenzá. No segundo tempo o encontro seguiu a mesma tónica e foi o Roupar o que logrou adiantarse cun tanto de Anxo a servizo de Paco. O Abadín logrou empatar nunha xogada embarullada na que Ferre enviou o balón ao fondo da portería. Nos últimos intres ámbolos conxuntos gozaron de ocasións para levar os tres puntos.

A Comercial despide a temporada regular con bo sabor de boca logo de golear ao Celeiro (5-1). O encontro foi de claro dominio local e no que a Comercial soubo aproveitar as ocasións das que dispuxo. Soto Spuch, Andrés e Nico deixaron o encontro visto para sentencia antes do descanso. O Celeiro, moi curto de efectivos, non foi quen de meterse no partido e Dani, xa no segundo tempo, sentenciou con dous novos tantos. Xa no tramo final Fran maquillou o marcador.

GRUPO SUR

O Corgo vence na Carqueixa e remata coas opcións de play off do Río Sil (2-3). Os locais estaban obrigados a gañar e agardar unha derrota da Piringalla. Non se deron ningunha das dúas opcións. O Corgo impuxo a súa condición de líder e adiantouse cun gol de Xoia. O Río Sil foi quen de igualar nun erro defensivo do Corgo. Nada máis comezar o segundo tempo, os visitantes fixeron o segundo, obra de Rubio. Logo dunha gran ocasión de Sebas para facer o terceiro, o Río Sil logrou o empate por medio de César. No desconto chegou o tanto do triunfo para os de Abel Rochela nunha boa acción de Rober.

O Rubián ascende a Segunda Futgal logo de derrotar ao Incio (3-2). Os locais sabían que un triunfo dáballes o ascenso matemático e non dubidaron na saída ao terreo de xogo. A primeira metade foi un monólogo do Rubián que deixou o encontro encarrilado antes do intermedio. Armesto e Víctor marcaron para os de Senén López, que foron superiores a un Incio que acusou as numerosas baixas. Malia a que o Rubián sentenciou nada máis comezar o segundo tempo, os visitantes non lle perderon a cara ao encontro e apretaron o marcador con tantos de Kenny e Valenzuela.

O Taboada B vence no derbi, pero ten que conformarse co terceiro posto (0-4). Os de Jacobo Vázquez venceron con comodidade ao Relámpago Taboada, pero xogarán o play off de ascenso logo do triunfo do Rubián. As ocasións sucedéronse para o filial e Pita marcou dous goles no primeiro tempo, un deles de falta directa. No segundo tempo, os de Melendo baixaron os brazos e o Taboada B xogou a pracer. Pita completou o seu hat-trick e Brian completou a goleada.

O Quiroga remata con vitoria fronte ao Carballedo nun encontro intrascendente clasificatoriamente (3-2). O partido comezou de cara para o Quiroga. Un erro defensivo do Carballedo propiciou o tanto de Manoliño aos tres minutos de xogo. A partir de aí foron os visitantes os que levaron a iniciativa no primeiro tempo xerando boas ocasións para lograr o empate, nas botas de Monchito e Carral principalmente, sen que este chegase. No segundo tempo, nunha contra, chegou o empate obra de Monchito. Pero non lle durou moito a alegría aos de David Guerra. Noutro erro defensivo o Quiroga fixo sangue cun gol de Rubio ao que respostou o Carballedo sen tardar establecendo o empate novamente. Preto do final, nun saque desde o curruncho Rubio deulle a vitoria ao Quiroga.

A Piringalla xogará o play off logo de golear a un Bóveda en inferioridade (7-1). O Bóveda acudiu ao encontro con só nove xogadores, cos que disputou os primeiros corenta e cinco minutos, sendo dez para o periodo final, o que xa afrontaron cun marcador moi adverso. O partido non tivo historia. O conxunto local xogou moi cómodo e logrou unha ampla vantaxe no marcador. Os visitantes lograron tirar unha vez á portería rival e conseguiron marcar, pero en ningún momento perigou a vitoria local. Cristóbal e Samu anotaron sendos dobletes.