A xornada para o Trío de Ases o Cantón trouxo o rexurdimento do Pol, que tras sete encontros sen acadar a vitoria lograron vencer por 3-1 ao Cidade de Ribeira. Ademais, o Lemos conseguiu unha importante vitoria pola mínima ante o Antela. No canto dos empates, no encontro do Racing Villalbés non foi o máis importante pola protesta dos xogadores polo céspede da Magdalena. Empatou tamén o Viveiro e caeron Burela, Lugo B e Sarriana.

Chegou a tan esperada vitoria do Pol

O Pol esperaba con ansia o momento de voltar a saborear os tres puntos e iso lograron ao vencer 3-1 ao Cidade de Ribeira. As cousas non puideron comezar mellor para os de Labrada, xa que no minuto 3 Marco atoupou un pase interior e logrou regatear ao porteiro e definir a placer. Na primeira metade, a vantaxe puido ser mellor con sendas oportunidades nas botas de Omar e Cuadrado, pero que non puideron ver porta.

O Cidade de Ribeira fíxose co dominio no inicio da segunda parte e aproveitaron un erro na saída de balón de Javi Liz para que Viturro igualase o encontro. Era momento de grandes figuras e saiu Omar para sacar aos chairegos do descenso. No minuto 60, Marco e Omar conectaron para que o dianteiro fixese o segundo. O mesmo goleador sentenciaría cun disparo á escuadra que devolveu os sorrisos no Municipal de Pol.

O Lemos faise forte na Pinguela

O Lemos demostrou todo o seu carácter para conseguir vencer na Pinguela ao Antela por 1-0 e consolidarse no cuarto posto da táboa da Preferente Sur. A loita xa comezou antes do encontro, xa que os monfortinos chegaron con sete baixas moi sensibles como a de Fito ou Dafonte entre outros. Iso sumado a un equipo que compite moi ben, fixo que o encontro fora un crebacabezas para o seu técnico, Edu Rodríguez.

Tras moitos axustes tácticos ao longo do encontro, no minuto 51 o Lemos atoparía ao gol a través da estratexia. Iñaki puxo un balón medido ao segundo pau, onde esperaba Youness para facer o que sería o único tanto do encontro. Incluso Nacho case anota un gol de Premio Puskas desde o medio campo, pero foi ao longueiro. O Antela estivo a piques de empatar no desconto cun man a man no que Pablo Losada salvaría aos seus.

Santomé, o gardián de Vilalba

O Racing Villalbés empatou por 0-0 ante o Boiro nun encontro onde houbo moito que contar. O partido retrasouse por mor de que non se vían as liñas do campo da Magdalena e, ademais, os xogadores fixeron un parón nos primeiros segundos de xogo para queixarse do terreo de xogo. No futbolístico, Santomé foi o salvador do Racing Villalbés ao deter un penalti no minuto 20 e facer unha grandísima parada na media hora.

Os axustes da segunda parte déronlle unha nova cara ao equipo, pero sen xerar grandes oportunidades. O encontro cambiaría a partir da expulsión por dobre cartón amarelo de Javi Rey. De novo, o Boiro deu un paso máis para buscar os tres puntos, pero de novo Santomé salvaría aos seus. A única dos de Juan Rodríguez foi un disparo de Pablo Trigo que marchou desviado.

A Mariña non logra acadar vitorias

Ao Viveiro tocoulle sufrir na súa visita ante o Gran Peña para manter o 0-0 no marcador. No primeiro tempo, os de Alberto López subiron as liñas e lograron ter dúas oportunidades claras nas botas de Rolle e Álvaro. Foi na segunda parte na que o conxunto vigués fixo sufrir aos da Mariña a partir de centros laterais e disparos desde fóra da área, pero sen xerar un gran perigo.

O Burela baixouse da zona da promoción tras perder na casa ante o Betanzos por 0-1. O encontro foi moi parello pero co dominio do conxunto betanceiro, pero sen grandes ocasións nas que amedrentaran a Kiko. O Burela mellorou a partir da media hora, pero na volta ao descanso o Betanzos adiantouse co tanto de Raúl Pita. Os de Oke non puideron facer un oco na defensa para poder igualar ata o minuto 92, no que reclamaron un posible penalti.

Derrotas con mal sabor de boca

A Sarriana perdeu ante un rival directo como o Rayo Cantabria por 2-0 nun encontro onde cinco minutos mataron as esperanzas de sacar algo positivo para os de Dani Giménez. Nun encontro que estaba a ser moi parello e sen grandes oportunidades para ninguén, Diego Fuentes sacou unha gran volea para abrir o marcador no minuto 73. Só tres minutos despois, a estratexia deparou na sentencia por parte de Manu González.

Pola súa parte, o Lugo B caeu ante o Silva por 0-2. O encontro ante o colista comezou con dominio para o filial albivermello, pero as áreas resultaron moi decisivas para o final do encontro. Rodrigo Alonso abriu o marcador no rexeite dun penalti que detivo Candal en primeira instancia. Na segunda parte, os lucenses tiveron oportunidades claras nas que Minibugy resultou decisivo. No tramo final, Parafita sentenciou o encontro cun remate raso ante o que Candal pouco puido facer.

Foto do Instagram do Pol.