Comezamos este novo diario cunha boa nova para un adestrador lucense. O pastoricense Fiz Rodríguez será o adestrador do xuvenil A da SD Compostela, conxunto que milita na División de Honra. O técnico ven de acadar o ascenso na última campaña co conxunto cadete do cadro santiagués.

A Terceira RFEF é a categoría que acumula máis novidades ata o momento. O Racing Vilalbés asinou a renovación dos xemelgos Varela. Javi e Jose seguirán unha temporada máis sendo xogadores referenciais no conxunto chairego. Canda eles estará Borja Míguez, un dos killers da categoría nos últimos anos. O fillo do adestrador Luisito chega procedente do Arousa, conxunto co que pelexou polo ascenso a Segunda RFEF. É a cuarta fichaxe dos chairegos tras os anuncios de Fito, Martín e Asier.

A Sarriana renovou a Javi Liz, un dos seus capitáns. O gardameta cumprirá a súa quinta temporada na Ribela logo de protagonizar un ano no que tamén xogou coa selección galega de afeccionados. No Viveiro seguirá o central Diego, según adiantou La Voz de Galicia. O de Guntín foi un dos fixos nas alineacións do cadro celeste.

Na Residencia non estará no seu proxecto en Primeira Galicia o polivalente Sergio. O futbolista pon fin así a súa traxectoria no cadro da Cheda. O San Lázaro poderá volver a contar con Nico Longhini. O adestrador xa tiña apalabrada a súa continuidade co conxunto capitalino antes de acadar o ascenso de categoría. Ás súas ordes estará o central Yeray Bao, que retorna ao club logo do seu paso polo Outeiro de Rei. Precisamente no Outeiro xogará o centrocampista Saúl Pérez, que chega ao Municipal procedente do Guitiriz.