Varios equipos do fútbol galego e lucense permanecerán moi atentos á última xornada da Segunda RFEF. O posible descenso do Racing Villalbés provocaría unha baixada en cascada de clubs dende a Terceira Galega. O Viveiro e os equipos lugueses da Preferente poderían verse influenciados pola clasificación do grupo I da cuarta categoría do fútbol estatal.
As contas do Racing Villalbés (dom. ás 12h)
- Pontevedra – Racing Villalbés (o Racing ten que gañar para ter opcións)
- Marino – Covadonga (se o Racing gaña, necesita que o Marino perda para quedar polo menos no posto de promoción de descenso)
- Coruxo – Gimnástica Torrelavega (se o Racing gaña precisa que o Marino e a Gimnástica perdan para conseguir a salvación)
O Racing Villalbés é o equipo do fútbol galego máis metido na loita pola salvación. Con todo, o Fabril aínda non ten a permanencia asegurada, necesita a vitoria se non quere depender do resultado do Marino e arriscarse a caer ao posto de promoción de descenso.
O cadro chairego precisa unha vitoria no último partido de liga para ter opcións de permanencia. O adestrador Simón Lamas cre que «o grupo chega ben, realizamos ante o Coruxo un dos partidos máis completos da temporada, a pesar de contar con varias baixas. Pensamos en darlle continuidade a esa versión».
«Vexo ao equipo convencido de que temos capacidade e de que sabemos como neutralizar ao Pontevedra. Chegamos nun bo momento incluso para que, no caso de ter que xogar unha promoción de descenso, o equipo responda ao 100%», salienta Simón.
«A nosa ambición por xogarnos a vida ten que facerse valer»
A última cita da temporada desenvolverse nun dos escenarios referencia do fútbol galego, Pasarón. O conxunto da Boa Vila rematará na segunda posición a liga regular e participará na fase de ascenso para tratar de volver á Primeira RFEF. Na primeira volta, empataran (1-1).
O técnico do Pontevedra, Yago Iglesias, xa adiantou na previa que Charly, Álex González, Chiqui e Garay non serán da partida. Ademais, apuntou que rotará aos futbolistas máis habituais, circunstancia que tamén agardaba o técnico vilalbés: «Esperamos un equipo con algunha rotación, pero igualmene o Pontevedra tratará de dar unha boa imaxe ante o seu público para chegar con boas sensacións ao play off. Agardemos que teñan tamén a cabeza algo posta nesa eliminatoria. A nosa ambición por xogarnos a vida ten que facerse valer«.
Simón Lamas cumprirá un novo partido de sanción (aínda lle queda outro) e non poderá dirixir aos seus dende o banco. Esa situación permitiralle estar pendente dos resultados do Marino e da Gimnástica de Torrelavega. «Tanto no banco como no campo temos suficiente só con gañar. O reto de vencer ao Pontevedra en Pasarón é o suficientemente importante como para despistarnos con outros campos«.
«Confiamos na profesionalidade do Coruxo e do Covadonga»
No caso de gañar, o Racing ten que agardar que polo menos un dos seus rivais perda. Se ningún dos dous suma puntos, o cadro de Vilalba sálvase. Non obstante, xogarán partidos contra equipos sen importantes motivacións clasificatorias en xogo. «Confiamos plenamente na profesionalidade dos equipos implicados, o Coruxo e o Covadonga. Aínda que non se xogan nada importante, cremos que van desputar un partido serio», apela o preparador.
O Racing preséntase na última xornada con 37 puntos nunha competición de 18 equipos. Pase o que pase este domingo, os xogadores do club chairego van deixar catro rivais por baixo na clasificación: «Co sistema de liga que temos, sabíamos que iamos estar nesta situación. Loxicamente, o equipo competiu tan ben e por riba das perspectivas iniciais que durante a temporada houbo algún momento que nos parecía que podíamos conseguir a permanencia con máis solvencia. O grupo pasou o baixón do momento difícil do curso e agora está competindo moi ben, a pesar de ter sempre baixas importantes durante a segunda volta».
Na memoria máis recente dos seareiros racinguistas están os dous puntos perdidos nos últimos intres co Cayón na Madalena. Simón cre que non é o momento de realizar unha valoración global: «Unha vez finalice a competición recopilaremos as análises de toda a tempada. Agora temos que esgotar as posibilidades ata o final. Este equipo ten moitísima competitividade dentro e seguro que imos ter as nosas opcións nesta última xornada frenética«, conclúe o míster.
O efecto cascada no fútbol galego
No caso de que o Racing descenda, provocaría a baixada do 15° clasificado na Terceira RFEF. Este arrastre só se evitaría se un equipo galego da Terceira ascende no play off. Se prosigue a cascada, tamén lle afectaría a un equipo da Preferente (dependendo de que equipo arrastre na Terceira, caería para a zona norte ou a sur). A partir de aí, ese descenso involucraría a un dos grupos da Primeira Galicia e así sucesivamente. No caso de que ese arrastre inflúa nun equipo lucense da Preferente podería provocar un descenso a maiores na nosa Primeira e Segunda Galicia.
