A intensidade e os Máxicos foron os protagonistas nunha nova cita da Primeira Galicia na nosa provincia.
Taboada 0-4 Outeiro de Rei: logo dunha primeira parte igualada na que o Taboada errou dous man a man e o Outeiro un penalti, os visitantes dominaron completamente a segunda parte, na que conseguiron facer os catro tantos do choque. O Outeiro non concedeu apenas ningunha ocasión no segundo tempo e levou tres puntos de ouro da Medela.
Pastoricense 1-1 Pol: partido vistoso no Acebreiro no que o Pastoricense mostrou unha gran versión defensiva, pois o Pol buscou a victoria pero tan só foi quen de anotar por medio de Xaime cun golpeo de falta. Isto ocorreu no 75′, pero os locais non se viron abaixo e conseguiron o empate no 79′. Ambos conxuntos trataron de facer o seu mellor fútbol e agasallaron aos espectadores cunha boa xornada matinal de fútbol.
Guntín 4-1 San Roque: o Guntín adaptouse mellor á climatoloxía e ao terreo de xogo e froito desolerete conseguiu poñerse tres goles por diante no minuto 60′, logo de anotar tras un centro lateral, nunha falta directa e cun bo chute desde a frontal. No 65′, o porteiro visitante, Roi, fixo o 3-1 cun gran golpeo desde a súa área, pero o Guntín sentenciou no 90′ co San Roque volcado. Mención aparte merecen Roi e César, xogadores visitantes que asistiron ao choque logo de finar o seu pai esta pasada semana. Ánimo e apertas para eles desde a nosa páxina.
Burela 4-0 Alfoz: o Burela volveu mostrar a súa mellor versión no derbi ante o CD Alfoz. Un gran comezo permitiu aos da Marosa dominar por 3-0 no minuto 30′. O Alfoz mellorou a partires do tercer gol, pero a solidez defensiva dos locais impediu aos alfocenses achegarse no marcador aos seus rivais. No 86′, o Burela puxo o broche a unha gran tarde cun gol de Iván Maseda.
Portomarín 4-1 SD Chantada: comezou de cara o choque para os miñotos cun bon gol de cabeza de Sergio. Pouco despois a SD empatou desde os once metros, pero o Portomarín púxose de novo por diante tras un contragolpe. Tras o descanso, os locais ampliaron a diferenza e, co Chantada volcado, conseguiron o 4-1 definitivo nos intres finais.
Castro 3-0 Riotorto: foi mellor na primeira parte un Castro que anotou o primeiro gol á saída dun córner. Os visitantes melloraron no treito final do primeiro tempo e no comezo do segundo pero, cando mellor estaban, o Castro aproveitouse dun penalti para ampliar as diferenzas. O Riotorto apretou, pero os locais sentenciaron ao contragolpe por medio de Adrián Román.
Chantada Atlético 3-1 Friol: foi superior o Chantada Atlético no Sangoñedo ante un Friol que o intentou pero recibiu un gol xusto antes do descanso que os deixou moi tocados, e os locais fixeron máis dano na reanudación, con outra diana. O Friol recurtou distancias no 81′ por medio de Michael e o Chantada sentenciou nos intres finais cun tanto de Dani Delgado.
Lourenzá 0-1 Xove Lago: a choiva e o vento foron protagonistas en Santa Cruz este domingo. No primeiro tempo os locais fixeron moito dano ao Xove por medio de pases interiores e jogadas a balón parado. Tras o descanso, os visitantes cambiaron o sistema e deron un paso adiante, pero os locais defenderon moi ben a súa área. Trullo foi decisivo unha vez máis e, nos intres finais do choque, Maikel fixo un golazo desde a esquina da área para sacar tres puntos do feudo dun Lourenzá que mereceu máis.
San Lázaro 0-2 Monterroso: os de Cerdeiriños levaron tres puntos de ouro das Gándaras logo de aproveitar as ocasións que tiveron no primeiro tempo. Aos 3 minutos, Lorenzo mandou ao fondo da rede un centro de Crespo e, media hora despois, este último fixo o 0-2. Os da Ponte cambiaron o sistema tras o descanso e apretaron a portería defendia por Xabi, pero non foron quen de anotar.
Folgueiro 0-2 Sporting Pontenova: logo dun primeiro tempo moi igualado no que o Folgueiro propuxo máis con balón e o Sporting agardou aos seus rivais pero gozou de ocasións á contra, os da Pontenova estiveron máis atinados na segunda metade. Aínda que no comezo do segundo tempo foron mellores os locais, os visitantes aproveitaron as súas opcións e conseguiron dous tantos que lles serviron para saír do Vicedo con tres puntos de ouro.
