Dúas derrotas para os nosos representantes na Terceira. O Polvorín non puido sacar nada positivo de Calabagueiros e caeu derrotado por un tanto a cero ante o Barco, nunha tarde de abafante calor, tendo que realizar unha pausa para hidratarse. Os de Durán tiveron ocasións para adiantarse por medio de Rayco, Quezada e Pablo Rey, pero foron os de Valdeorras os que lograron o gol. Na reanudación, o filial lucense non se rendiu e Antón Escobar e Cuadrado, xa moi preto do final tiveron o empate nas súas botas. O ex xogador do C.D. Lugo, Rubén García tamén puido sentenciar, pero Cacharrón estivo atinado.

O Racing Vilalbés sumou a terceira derrota consecutiva, tras caer derrotado  (1-0) no campo do Laracha, no que foi o reencontro con Óscar Gilsanz, un dos artífices da mellor temporada da historia do cadro chairego. O tanto do Laracha chegou logo dun protestado penalti. Os de Xoan Peón seguen sen dar coa tecla axeitada.

Xornada sen derrotas para os nosos equipos da Preferente. O derbi entre o Castro e o Ribadeo rematou con empate a dous tantos, nun encontro con un expulsado e catro penaltis. O primeiro deles chegou no minuto 2 e supuxo a vermella directa para Mario. Moi protestado polos mariñáns ao entender que existira fóra de xogo previo. En inferioridade, o Ribadeo levou a iniciativa do partido e adiantouse por medio de Poratti. Os xogadores hoxe adestrados por Brais Prados igualaron cun tanto de Hugo Buide nunha xogada aillada. Na segunda metade Santi errou desde os once metros, e na seguinte pena máxima foi Fer quen adiantou ao Ribadeo. O Castro deu un paso adiante e Dumi igualou tamén desde os once metros.

O Viveiro logrou a terceira victoria consecutiva ao gañar 0-1 no García Calvo ante o Negreira con gol de Tichu. Os de Chusky foron xustos vencedores do partido e incluso puideron obter un resultados máis amplo. Contaron con numerosas ocasións e estrelaron dous balóns no pao.

O Foz non puido pasar do empate no Martínez Otero ante o poderoso Arzúa (2-2). Os erros defensivos seguen a penalizar de xeito moi duro aos de Gayol, que foron lixeiramente superiores a un rival que se agarda remate na zona alta. Gonzalo e David Rodríguez marcaron para os focenses.

A Sarriana acadou un punto no campo do Atlético Coruña Montañeros que lles a pouco. Os de Alberto López adiantáronse no minuto 20 cun tanto de Omar tras pase de Marzán. Na segunda metade, chegaron os mellores momentos dos sarriaos e Quiroga anota o segundo tanto. A falta de pouco máis de dez minutos, o colexiado expulsa ao porteiro Javi López tras cometer un penalti, pero a pena máxima foi detida polo debutante Ayoub. Nun desconto, que foi de seis minutos chegaron os dous tantos dos coruñeses.

 

Comparte

Sobre o autor Ver todos os posts

Marcos Fernández

Marcos Fernández

Apaixoado do fútbol, en especial do modesto, que aínda mantén os verdadeiros valores do deporte

Deixa un Comentario

O teu Email non se publicará. Cubre os campos requeridos*