A Real Federación Galega de Fútbol fixo oficial o inicio e o formato de competición da Preferente Norte. En principio, a liga comezará en dúas semanas (a finde do 31 de xaneiro). A categoría queda dividida en tres subgrupos. Tal e como estaba previsto, os conxuntos lucenses competirán entre si na 1ª fase. Desputarán doce encontros. Os dous primeiros clasificaranse para a fase polo ascenso. Os cinco equipos restantes xogarán pola permanencia. Haberá dous ascensos a Terceira. E un descenso directo á Primeira Rexional máis posibles arrastres.
⚠️ O mércores 20 de xaneiro sorteo da Preferente, en directo por streaming
???? A competición iniciarase o vindeiro 31 de xaneiro
— Futbolinlugo (@futbolinlugo) January 14, 2021
Nuns días de datos récord no tocante a incidencia da covid en Galicia, a Futgal comunicou a data de comezo da Preferente. Será tan só unha semana despois do previsto no mes de decembro. Dos tres subgrupos que hai, o da provincia de Lugo é o que aglutina menos equipos. Fórmano sete conxuntos: CD Foz, Ribadeo CF, CD Santaballés, Residencia, Sarriana, Atlético Escairón e Club Lemos.
Os outros dous restantes están constituídos por oito clubs:
Da comarca de Ferrolterra, A Coruña e incluso zona de Bergantiños: Galicia Mugardos, Montañeros, Victoria CF, Betanzos, San Tirso, Laracha, Arteixo e Sofán.
Da contorna de Santiago, Noia e Barbanza: Boimorto, O Pino, Sigüeiro, Dubra, Xallas, Noia, Boiro e Puebla.
Que implica ser menos equipos no subrgrupo lucense?
Só dous equipos de Lugo pasan a fase polo ascenso. Acceden xunto con outros seis conxuntos máis. Son oito en total que se dividen en dous grupos. Atendendo a criterios de mellor clasificado e mellor puntuación. En cada grupo quedan catro equipos. Estarán clasificados por esa orde de puntuación da 1ª fase e recibirán catro, tres, dous e un punto respectivamente para iniciar esa nova fase. Xogarán seis partidos (unha liga a dobre volta) e ascende o primeiro clasificado de cada grupo.
Permanencia:
Os cinco equipos de Lugo pasan a loitar por evitar o descenso xunto a outros dez máis. Son 15 conxuntos en total que se dividen en tres grupos. Tamén atendendo a criterios de mellor clasificado e mellor puntuación. En cada grupo quedan cinco equipos. Estarán clasificados por esa orde de puntuación da 1ª fase e recibirán seis, catro, tres, dous e un punto respectivamente para iniciar esa nova fase. Xogarán oito partidos (unha liga a dobre volta). Dos tres últimos clasificados de cada grupo descenderá o que teña peor baremo de deportividade (fair play).
A partir de aí, o máis seguro é que baixen máis equipos por culpa dos arrastres de Terceira. Hai que lembrar que van descender oito conxuntos dende a Terceira Galega. Falta por ver en que grupo da Preferente se encadrarían os clubs que baixen e en que medida lle afectaría aos lucenses. Dende logo que a puntuación vai ser clave dende un primeiro momento.
