A xornada número dezasete na Preferente Norte déixanos os triunfos de Viveiro e Foz nos derbis provinciais ante a Sarriana e o Castro respectivamente, e a debacle do Ribadeo no campo do Ordes.
O que se prevía como un derbi igualado entre dous equipos da zona alta rematou en goleada. O Viveiro está en estado de gracia, e gañoulle á Sarriana por cinco tantos a cero. E o certo é que contou con ocasións para que a diferencia no marcador fose maior. Os visitantes manteñen o segundo posto, pero xa ven de reollo aos mariñáns, a tan só tres puntos. Os de Alberto López non estiveron acertados e víronse superados polo Viveiro desde o comezo. Tan só Rubén Díaz na primeira metade, nun man a man ante Kiko, e Álvaro nun lanzamento de falta que foi ao pao cando o partido xa estaba resolto, tiveron opcións de gol para a Sarriana. Xa no primeiro minuto, Uriol e Tichu, á saída dun córner puideron adiantar aos de Chusky, que non tardaron en facelo, cando Marino driblou a dous rivais e marcou desde a frontal. Malia que o de Meira voltou a ter outra clara ocasión, así como tamén Álex Meitín, non foi ata o minuto 39 cando Rolle desde fóra da área superou a Javi López. Xusto antes de rematala primeira metade, Xaime fixo o terceiro ao rematar a pracer un bo pase atrás de Meitín. A segunda metade non tivo historia, Rolle anotou o segundo na súa conta particular ao aproveitar outra boa asistencia de Álex Metín, ao igual que Xaime logo dun servicio de Marino.
O outro derbi da xornada viviuse no Martínez Otero. Terceiro triunfo consecutivo do Foz (3-2) que tivo que remontar ante o Castro. Os chairegos adiantáronse no marcador antes dos dez minutos cun zurdazo de Chumi logo dunha boa acción de Buíde. Os mariñáns, nervosos e sen fluidez estrelábanse ante os de Brais Prados, ordenados e con dinamita á contra. Moi preto do descanso, Gonzalo enganchou un bo tiro cruzado e acadou o empate. Aos sete minutos da reanudación, Gayol moveu o banco e meteu no campo ao seu fillo Iban e Asier e cambiou o panorama. O Castro tivo unha clara opción nun remate do goleador Chumi, pero Bruzos respostou de xeito espectacular. A partir de ahí, Asier convertiuse no xogador clave do encontro. Impuxo a súa calidade e dous golazos seus resolveron o encontro. Xa no desconto, Dani Montes á saída dun córner recurtou distancias.
O Ribadeo prolongou a súa mala xeira en Vista Alegre ante o Ordes, onde caeu por 4-0. Os de Rafa Casanova asinaron o peor encontro da temporada. Tan só Luki, xa co encontro resolto, inquedou a portería rival. Os mariñáns manteron o tipo ata a media hora de xogo, cando o Ordes fixo o primeiro, pero xa en inferioridade no marcador, non foi quen crear perigo, e na segunda metade chegaron tres tantos máis. Tan só un punto acadado dos últimos doce en xogo, fan que o Ribadeo se alexe da zona alta, malia mantelo sexto posto da clasificación.
