O Lourenzá e o Foz asinan táboas no derbi (2-2). A primeira parte, pese a contar con numerosas ocasións para ambos lados, rematou sen goles. Porén, o segundo tempo arrincou cunha boa combinación de Dani Celeiro e Dani Chao para facer o 0-1. Os Máxicos locais non baixaron os brazos e anotaron a igualada nunha transición. Pouco despois, Yago puxo o 2-1 cun disparo cruzado e, aínda que o Lourenzá tratou de manter o resultado, Álvaro Moreda anotou unha pena máxima para poñer o 2-2 definitivo.

Houbo empate no derbi mariñán dos máxicos

O Monterroso rentabiliza as ocasións no feudo do Chantada Atlético (0-2). Gabi Cantillo rematou ben un balón parado para adiantar aos visitantes na recta final do primeiro tempo e, pese a que os Máxicos chantadinos buscaron con insistencia o empate ao longo da segunda metade, unha transición do Monterroso saldouse cunha pena máxima que anotou Lorenzo para levar tres puntos de ouro cara Cerdeiriños.

O Burela imponse ao Meira e segue líder (3-1). Un Meira repregado sufriu o dominio posicional dun Burela que estivo a gran nivel e conseguiu o 1-0 cun centro de Adri que a defensa visitante rexeitou cara a súa propia porta. No segundo tempo, os cambios deron aire fresco ao choque e unha transición valeulles aos Máxicos de Oke para poñer o 2-0 por medio de Diego Chao. O Meira deu entón un paso adiante e Farra recurtou diferenzas nun remate a un centro desde banda dereita, pero Jairo Campo sentenciou o partido co definitivo 3-1 na Marosa.

O Santaballés segue en boa liña diante do Taboada (2-0). Os Máxicos de ambos conxuntos amosáronse moi intensos e concentrados ao longo dos 90′. Novás anotou un penalti para adiantar aos seus á media hora de xogo e, no segundo tempo, o Taboada buscou as súas opcións con transicións para facer dano aos chairegos. Coa expulsión de Diego, os visitantes perderon forza e o Santaballés puido sentenciar co 2-0 definitivo cando restaban poucos minutos de xogo.

O Oural e o Xove Lago asinan unhas táboas que non satisfacen a ningún (1-1). Os sarriáns foron mellores no primeiro tempo e chegaron ao descanso cunha vantaxe de 1-0 que puido ser maior de ter maior efectividade. Porén, o cadro visitante deu un paso adiante na reanudación e lograron o empate na recta final nun duelo marcado pola alta intensidade de ambos conxuntos e no que o Oural errou unha pena máxima.

O Racing Villalbés e o Castro empatan na re-estrea do Estadio Roca (1-1). O Castro foi mellor no primeiro tempo, pois contou con numerosas ocasións e, de feito, anotou o 0-1 por medio de Álvaro, mentres que os Máxicos locais só contaron cun disparo ao pau de Aarón. Tras a reanudación, Álex anotou unha falta directa para poñer o 1-1 e, tras o empate, houbo opcións para ambos conxuntos. Porén, as defensas impuxéronse e o electrónico non se moveu máis no «novo» Roca.

A Milagrosa cae na súa visita a Santa Mariña (2-0). Duelo moi parello en Cotogrande, cunha Milagrosa que amosou un excelente dominio do xogo defensivo e que gozou das súas opcións para levar algo positivo do feudo do Santa Mariña. Porén, a insistencia local traduciuse no 1-0 na recta final e no 2-0, que chegou tras un penalti logo dun claro fóra de xogo. Ao término dos 90′, os Máxicos lucenses levaron menos premio do merecido en Vigo.