Rematou a competición regular na Preferente e ningún dos equipos lucenses ten que agardar a nada para saber o seu futuro. O Lugo B xa sabe que non xogará fase de ascenso, a pesar de acabar en posto de promoción na clasificación. Non obstante, a posibilidade de que só o Rápido de Bouzas poida ascender á Segunda B deixa só opción a xogala promoción entre os mellores terceiros. Esta mesma situación implica o descenso á Primeira Galicia do Lemos que ten como consecuencia a baixada de categoría por parte do Burela á Segunda Galicia.

O filial albivermello pechou a temporada cunha vitoria por 4-0 ante o Sada cun novo papel destacado para Dani Renda e Cuadrado, arroupados por un gran Luis Díaz. Unha gran temporada que finalmente non puido ser culminada co posible ascenso. Outro gran ano foi o que fixo o Escairón, que remata o ano na sexta posición despois de conseguilo ascenso o ano pasado. O equipo de Alberto López gañou no último partido ante o xa descendido Chantada por 2-4. Félix, Basán e Iván González foron os máis destacados do encontró polo lado visitante. No bando local, os canteiráns Meirás e Povis destacan na esperanza do Chantada que marcha con gañas de volver á Preferente.

O Lemos completa os tres descensos de equipos da provincia cara á Primeira Galicia. Non lle serviu de nada a vitoria por 1-0 ante o Bertamiráns (que tamén descende) ao non producirse os ascensos necesarios de Terceira á Segunda B e deixar prazas vacantes na Preferente Norte, no caso de que ascendesen os equipos da promoción. Diego Arias e Santi foron os máis destacados na despedida da categoría.

Por outro lado, pecharon o curso con derrotas os outros tres equipos lucenses. O Ribadeo caeu na casa ante o Arteixo por 1-2, con Criss como futbolista máis destacado polo cadro de Fiz que seguirá un ano máis no banco do Pepe Barrera. O Viveiro perdeu por 2-0 ante un dos candidatos o ascenso e que finalmente xogará a promoción dos mellores terceiros, o Estudiantil. Os equipos mariñáns levaron un camiño moi paralelo e pagaron caro o seu mal inicio. Tamén dixo adeus á Preferente a Sarriana que perdeu por 1-2 ante o Betanzos e encadea oito derrotas consecutivas.

Aínda que a competición regular, rematou agora é o turno da Copa Deputación que xogarán cos equipos de Primeira.