• O Antas firmou un empate agridoce ante o Victoria FC B
• O San Lázaro cae ante a Esteirana nun partido no que mereceu máis
• A Milagrosa segue de doce e remata o ano como terceira clasificada
• O San Roque sae goleado da visita do Bandeira pese ás boas sensacións
• Táboas no derbi do sur lucense entre Carballedo e Monte Forte

Non fallaron as friolesas na última cita do ano. Unha gran primeira parte das amarelas que, porén, só puideron anotar por medio da habitual: Yoleidis. O seu único tanto na primeira metade determinou o partido.

Porén, o PM Friol durmiuse por completo na segunda parte, o que lle puido custar caro malia que o Concello de Boiro apenas causaba perigo. As friolesas baixaron o pé do acelerador, coma se foran gañando de goleada. Finalmente o marcador non se moveu, pero a imaxe non foi a agardada.

Con todo, o pinchazo do Victoria CF ante o Bergantiños devolve ao PM Friol á segunda praza, a dous puntos do líder, As Celtas B.

Un empate moi agridoce para as de Óscar Méndez, que malia comezar erdendo, conseguiran empatar o partido no 77′ co gol de Melanie Vázquez e pórse por diante xa no 86′ grazas ao tanto de Nuria.

Porén, unha falta realizada nos últimos intres do partido, condenounas. O árbitro sinalou un tiro libre moi preto da área defendida por Xanaia que acabou transformando Alicia, do Victoria FC B, para repartir puntos entre ambos conxuntos e deixar con unha sensación agridoce ao Antas, que conseguira remontar o partido a un dos grandes equipos da categoría.

Non tivo o día o San Lázaro, que malia ter ocasións favorables non conseguía anotar. Quen si o fixo foi Rut, da Esteirana, xa no 4′ para adiantar ás súas.

As de Rubén Candal non baixaron os brazos, pero á volta dos vestiarios foi Bárbara quen ampliou a vantaxe para as locais, Melania, no 70′, puxo a renda do 3-0 e só Iria, xa no 89′ maquillou o resultado final: 3-1.

Nova vitoria dunha Milagrosa lanzada. Malia comezar perdendo o partido, cun gol de Claudia no 21′ para o Corme, as de Héctor Expósito axiña volveron ás táboas grazas ao tanto en propia porta de Saskia no 23′.

Para sorpresa de ninguén, foi Irene quen puxo por diante ás milagrosistas no 70′, pero no 80′, Carla devolveu as táboas anotando no 80′. Pero a actitude impecable das luguesas daríalles a vitoria, loitando por ela ata o final. Foi Seguín quen, no 92′ anotou o definitivo 3-2 para a Milagrosa. Tres puntos máis para colocarse xa terceiras, en play-off, e pechar un ano para a lembranza albivermella.

O partido comezou moi desputado por ambos equipos aínda que o Bandeira se adiantara xa no min. 6. As de Blas non baixaron os brazos e o San Roque comezou a ter claras ocasións. Así, no 21′, Miriam anotou o gol do empate cunha gran xogada que culminou cun disparo cruzado.

O San Roque colleu ritmo, atacando e defendendo ben. Porén, a escasos minutos de rematar a primeira parte, un desaxuste trouxo o 1-2 para o Bandeira.

Na segunda parte, ambos conxuntos saíron ao campo con todo. Iso motivou grandes ocasións para ambos, pero ao cuarto de hora a lesión de Lourdes marcou ao San Roque. Malia que tratou de seguir no campo, na práctica o San Roque quedou con 10 e o Bandeira aproveitouno de gran maneira, para chegar ao 1-5 final.

Porén, a lectura no cadro verdibranco é moi positiva, cunhas xogadora que o deron todo malia as adversidades. Con esta actitude e xogo, Blas está seguro de que no 2026 os resultados chegarán.

Partido moi igualado no Catro Ventos, cunha primeira parte na que o Carballedo tivo varias ocasións para pórse por diante, pero non transformou. Á volta do descanso, as rosas saíron pouco concentradas e o Monte Forte aproveitouno para que Paulita puxera o 0-1.

O Carballedo volveu ao partido con madurez, aplicando a estratexia marcada por Sementa, que deu os seus froitos. Carla anotou no 86′ para as locais, repartindo os puntos do derbi.