Non rodará o balón nos campos da nosa provincia este fin de semana. Un positivo no conxunto coruñés do Silva provocou o adiamento do encontro programado para o domingo ás 12 horas en Cantarrana diante do Viveiro. Desta maneira, os mariñáns non voltarán á competición ata o vindeiro 29 de novembro. Será no campo do Viso ante o Arzúa.
Quen tampouco xogará este fin de semana será o Polvorín, o que supón o terceiro encontro adiado no que vai de temporada. Os dous primeiros foran por mor de varios positivos no filial albivermello e agora no que sería o seu rival nesta sexta xornada: o Bergantiños. O equipo adestrado por José Luis Lemos comunicou a existencia de varios positivos nas últimas probas. De tódolos xeitos, un xogador do conxunto carballés xa fora positivo a pasada semana, aínda que segundo comunicou o clube non fora contacto estreito dos seus compañeiros e o Bergantiños xogou diante do As Pontes.
O único dos nosos representantes que disputará o seu encontro nesta xornada será o Racing Vilalbés. Farao o domingo ás 17 horas en Santa Isabel diante do Estudiantil. O partido servirá de estrea para Gelucho, novo adestrador do cadro local, en sustitución de Gonzalo Lestayo, que tan só dirixiu ao equipo en catro encontros. Os malos resultados, dous empates e dúas derrotas, que sitúan ao Estudiantil como pechacancelas do grupo, unido ao desconcerto institucional que vive o clube foron as claves do troco de rumbo desde a parcela técnica. O Racing Vilalbés, que buscará un triunfo que o acerque aos postos cabeceiros, suma dous encontros sen gañar logo de caer derrotado no campo do Bergantiños e do empate ante o Fabril, nun encontro no que os de Simón Lamas amosaron unha gran imaxe.
Outro conxunto que disputa a súa xornada lonxe da nosa provincia é o Peluquería Mixta Friol, que viaxa a Valladolid para medirse ao C.D. Parquesol Patatas Meléndez, o domingo ás 13 horas. O conxunto de Abraham García afronta o encontro desde o derradeiro posto da clasificación cun único punto logo de catro xornadas disputadas. O técnico gaditano contará para este encontro coa última incorporación do PM Friol, a gardameta nipona Mia Nemoto, que procede do Joventut Almassora, co que xogou a pasada temporada en Primeira Nacional.
O conxunto pucelano atópase na zona media da táboa clasificatoria con catro puntos en tres encontros disputados.
