Volveu o ‘Fútbol na lama’ a provincia naqueles encontros xogados o domingo pola tarde. Non foron maioría porque moitos decidiron non competir co ‘Clásico’ do fútbol profesional e xogaron o sábado ou, incluso, o domingo pola mañá.
Xa ninguén se mantén con pleno de vitorias na Segunda Rexional. Na quinta xornada o Meira non pasou do empate en Guitiriz. Pero alí pasou un feito digno de mencionar. Máis detalles en #ONoso11Futbolinlugo.
Na zona norte, o Meira non puido seguir coa boa xeira. Non obstante, mantense invicto na cabeza do grupo con dous puntos de marxe. No Suso Cruz pódese dicir que houbo dúas partes diferenciadas. Unha primeira na que foi o Guitiriz o que se luciu máis. No segundo acto, os visitantes xeraron máis perigo pero ninguén foi quen de traspasala liña de debaixo das porterías. Os locais quedan preto da zona nobre.
Non houbo goles en Guitiriz pero aconteceu unha das xogadas máis honradas de reseñar da xornada. Cando Rubén Vidal ‘Seixosmil’ encaraba con perigo a portería rival, ao seu defensor Ivan Ansede ‘Jaba’ deulle un tirón que lle imposibilitou continuar a carreira. De seguido, o atacante do Meira decidiu botar o balón fóra cando podería anotar un gol clave.
Dáse a curiosidade que o futbolista da parroquia meirega de Seixosmil (de aí o seu alcume) marcara nas catro xornadas desputadas nesta campaña. Quedou sen o gol, pero marcoulle un tanto a deportividade. Pola súa banda, o central dos Vilares probablemente sexa baixa nas próximas semanas por problemas nun isquio.
Na segunda praza sitúase o Roupar. O conxunto preparado por Dopico enlazou o seu segundo empate consecutivo. Xogou na matinal do domingo ante o Iberia en Reinante. O vento foi un dos protagonistas. Dani Prieto adiantou aos locais na primeira metade. Nada máis comezar o segundo tempo, o cadro verde empatou. O Iberia queda ás portas do play off.
Con dez puntos na terceira e na cuarta posición están o Folgueiro e o Muimenta. O conxunto do Vicedo superou como visitante a un bo Castro B. A maior pegada dos de Manuel Vicente deulles os tres puntos.
Pola súa banda, o Muimenta sacou un importante triunfo da súa visita á Fonsagrada a pesar de estar moi xustos de efectivos. Tanto que Basi tivo que retrasar a posición de Jairo ata o lateral. Os locais non se atoparon cómodos ao longo dos noventa minutos.
Miguel abriu o marcador logo dun centro de Seijas. Antes do tempo de lecer, o Fonsagrada conseguiu igualar a balón parado. No segundo tempo, foron os visitantes quen desequilibraron a balanza nos útimos minutos do encontro.
No 5º posto (aínda en zona de play off) colócase o Xermade. Logrou un triunfo importantísimo na casa ante un Alfoz con varias baixas. Poderíase dicir que os locais foron superiores no cómputo global. Luciuse Eyob. O futbolista, que chegou este curso ao equipo, viña ofrecendo boas prestacións dende o mediocampo nas últimas xornadas. Neste encontro marcou dous goles.
No trío de equipos con oito puntos ás beiras do play off está a Comercial (ademais do Iberia e do Guitiriz). Os pupilos preparados por Andrés Rodríguez sumaron a segunda vitoria da temporada ante unha Candelaria que acumula tres derrotas consecutivas. Intenso duelo baixo a choiva que os capitalinos se levaron pola súa maior efectividade.
Na zona media baixa, salientaron os primeiros triunfos do curso do Cospeito e do Celta Barreiros. O equipo da Fonte superou na casa ao Cabreiros nun partido moi completo dos xogadores adestrados por Luis. Os visitantes, con algunha baixa, recoñeceron a vitoria local. De feito, o porteiro Nesi foi o mellor dos seus.
O Cabreiros segue incorporando xogadores. Ficha a Brais, atacante que levaba dous anos sen xogar ao fútbol e conta con pasado na base do CD As Pontes.
Pola súa parte, ao Celta Barreiros sentoulle ben o horario matinal de domingo e sumou de tres por primeira vez. O encontro co Goiriz foi desputado nos primeiros minutos, pero a partir de aí os locais comezaron a crear ocasións. O vento fixo acto de presenza e afectou negativamente aos dous conxuntos.
O Goiriz queda tocado logo da cuarta derrota do curso. Xunto ao Castro B son os dous equipos que seguen sen gañar nas primeiras cinco xornadas de liga.
Na zona sur, un trío de equipos manda na clasificación. Pola diferenza de goles é o Guntín quen segue na cabeza da táboa clasificatoria. Unha diferenza que ampliou con claridade esta xornada logo derrotar ao Carballedo por oito goles. Debasa foi un dos protagonistas con tres goles, xunto a xogadores como Rubén Pena que tamén sobresaíron e anotaron o seu gol.
Colideran o grupo o Paradela e o Oural. Os pupilos adestrador por Rubén Bergantiños derrotaron ao Río Sil. Non foi ata os últimos intres cando se resolveu o partido. Comezaron perdendo os locias antes do descanso. No segundo acto remontaron momentaneamente, pero os de Cabanelas logran igualar antes do terceiro definitivo. Romy segue coa puntería afinada e marcou dous novos goles.
Pola súa banda, o Oural venceu a domicilio a un Corgo que, xunto co Carballedo, non puido gañar nas cinco xornadas que van de competición. Os de Negrete venceron por tres goles de diferencia. Un penalti en contra e un gol en propia na primeira media hora foi demasiado peso que levantar para os locais.
O San Lázaro e a Milagrosa completan nestes momentos os postos de play off. O equipo nado na Ponte superou pola mínima a un Becerreá que sufriu a segunda derrota seguida (algo ao que non estaba acostumado neste case intratable 2022). Os celestes colleron moi cedo vantaxe. Sen dúbida, o segundo gol foi do máis salientable e clave do encontro.
Non hai vídeo, pero quedará nas lembranzas dos presentes como Borja Candal lle pegou ao balón dende uns sesenta metros de distancia a portería. Dende campo de seu marcou o gol. O Becerreá tentouno dende aí pero tamén se atopou coas grandes accións do gardamallas Pipita.
Pola súa banda, a Mila igualou ante o Friol na Reigosa nun encontro con seis goles. O encontro tivo de todo. Pero foron os locais quen remataron con mellor sabor de boca. Perdían 1-3 e no tramo final foron quen de igualar o resultado.
Na zona media da táboa atópase o Brollón que sumou o segundo triunfo do curso ante o Lemos B. Os locais foron de menos a máis no primeiro tempo e conseguiron adiantarse. A volta dos vestiarios, o filial lemista puido equilibrar o resultado ao contragolpe pero non estiveron acertados. Nunha acción a balón parado Tourón marcou o segundo para os seus e ante unha bancada dos Medos que rexistrou unha gran entrada.
Seguindo entre a zona media baixa da clasificación houbo dous empates máis. Por un lado, o San Roque empatou tamén a tres goles en terreo chantadés ante o filial da SD. Partido tolo no que os locais lograron adiantarse nunha primeira metade na que non foron mellores en canto a xogo.
No segundo tempo, os locais marcaron o segundo de penalti. Máis tarde, o San Roque quedou con dez pola expulsión de Edgar. Cando parecía que o partido estaba decantado, os visitantes recurtaron distancias de penalti e empataron a balón parado por medio de Sito. Dous minutos máis tarde, o filial fixo o 3-2. O San Roque tirou de orgullo e Sito marcou o seu segundo gol e deulle o empate aos seus.
Tamén igualaron o Ferreira e o Sporting Lucense que quedan ambos con cinco puntos.
