O Monterroso vive unha situación única no fútbol lucense. Na Primeira Futgal, o primeiro equipo encóntrase na zona perigosa da clasificación, inda que con catro puntos de diferencia co Oural, último equipo en postos de descenso. Mentres, na Terceira Futgal, o Monterroso B lidera en solitario con un punto de vantaxe con Sporting Lucense e Sober. Se houbese un descenso, o filial non podería subir a Segunda Futgal, mais non se podería saber antes de que acabe a Terceira, senón case dous meses despois do final da competición.

Se hai opción de salvación, o Monterroso B xogaría promoción

Se o Monterroso B gañase no campo a opción de poder xogar a promoción de ascenso e o primeiro equipo inda tivese opcións a obter a permanencia, dende a Real Federación Galega de Fútbol aseguran que o filial disputaría o play off con total normalidade. En caso de ascenso directo, a Federación decidirá no seu momento como se resolvería esa hipotética problemática se o Monterroso descendese. O que é seguro é que se o Monterroso B o gaña no campo, xogaría a promoción.

No clube inda «non pensamos nesa situación porque confíamos plenamente en que imos permanecer na Primeira Futgal unha tempada máis» asegura o presidente da entidade, Balbino. Unha situación curiosa da que, en tempadas recentes, non houbo casos nos que ocorrese, o que fai moito máis única a situación.

Hai antecedentes, sobre todo no fútbol profesional, de filiales que loitaron por ascender a segunda cando o primeiro equipo inda loitaba por non descender, o máis próximo é cando o Celta B xogou ante o Eldense a ida da promoción de ascenso e, ao día seguinte, o Celta lograba a permanencia matemática contra o Barça. Pero isto non quita que a situación sexa diferente polo tempo que pasará entre o final das dúas competicións, case dous meses.