Xornada de vitorias de PM Friol, SD Antas, Milagrosa, SD Chantada e San Roque.

Partido complicado para as amarelas nun campo de dimensións moi pequenas e moi enlamado no que era imposible despregar o seu particular xogo combinativo.

Porén, as friolesas souberon adaptarse ás circunstancias e a sempre loitadora Yoleidis sacou petróleo dos balóns lanzados á área. O PM Friol, que comezara perdendo, empatou cun rexeite que cazou Keisy. Yoleidis provocaría o penalti que ela mesma transformaría para pór o 1-2, pero Carla volvería a poñer as táboas no partido (2-2).

De novo, o xogo embarullado na área beneficiaría ás friolesas que tras un novo penalti anotado por Mery; porían o definitivo 2-3 para seguir na loita polo liderato, a dous puntos do primeiro clasificado, As Celtas.

O encontro púxoselles moi de cara ás ulloás pese a que nos primeiros minutos custoulles entrar no partido ante un gran rival, o Xallas. Pouco a pouco as de Óscar Méndez foron carburando e Jenny axiña fixo a súa cotiá aportación ao gol no 47.

Nuria aumentaría a vantaxe para as celestes no m. 68 (2-0), deixando o partido encarrilado. Pouco despois, Jenny volvería antoar para colocar o 3-0 no luminoso no 73, o que a priori parecía indicar que o partido quedaba sentenciado.

Porén, o Xallas non baixou os brazos e o Antas levantou o pé do acelerador. Así, Olalla recurtaba distancias 3-1 no 78 e a ilusión das visitantes medraba ao tempo que as dúbidas dos finais dos partidos, que se repiten nas últimas xornadas, volvían a asomarse no Castro Seoane.

Os nervios medraron cando Yanire tivo o infortunio de anotar en propia porta e a distancia entre ambos conxuntos se reduciu a un só gol. O Antas rematou pedindo a hora, pero selando unha nova vitoria.

Con Irene como directora de orquestra e tras unha gran primeira parte, a Milagrosa batía por un resultado final de 8-4 ao Órdenes. Na primeira xogada do partido Irene puxo o primeiro tanto do encontro e o primeiro dos seus 4 goles do seu casilleiro particular no partido. Alexia, Pérez, Gabriela e Pilar sumáronse ao festival de goles para manter as distancias cun Órdenes que nunca baixou os brazos.

Gran partido das vermellas dirixidas por Fornas, que golearon ó pechacancelas, a Comercial, pese a que as de Vicky Burgo presentaron dificultades e igualdade nos primeiros 20 minutos do encontro.

Rocío Carnero abría o marcador no 24, poñía ás chantadesas por diante e volvía a sumir no desánimo ás luguesas, que deseguido baixaron os brazos. Laura Caseiro puxo o segundo cazando un rexeite e anotando cun disparo lonxano. Isabela, Iria, Lucía e de novo Laura Caseiro aumentaron a renda ata o 6-0 final nun partido que só tivo unhas donas.

Catro vitorias en cinco xornadas para as da capital do Asma que as colocan líderes en solitario.

As de Sementa tiveron numerosas oportunidades para pórse por diante no luminoso nunha primeira parte moi igualada ante o Cruces. A falta de acerto condenou ás rosas, que á volta dos vestiarios volveron errar unha ocasión clara e, cando mellor estaban, encaixaron o 0-1.

O Carballedo seguiu loitando e Sara puxo de novo as táboas no luminoso no 65. Porén, nunha contra volvería a adiantarse o cruces por medio de Claudia, no 97. O definitivo 1-3 chegaría de novo das botas de Claudia, nunha xogada moi controvertida por un posíbel fóra de xogo. Fose como for, o tanto subiu ao marcador e as posibilidades do Carballedo de sumar unha vitoria esfumáronse.

O Bandeira non deu opcións ao Monte Forte na casa das lemesas. Axiña se adiantaron as visitantes, cun gol de Sofía no 19 ao que se sumaría, antes de enfilar aos vestiarios, un penalti transformado por Eva.

Tras a volta do descanso, María aumentou aínda máis a vantaxe para o Bandeira no 48. Marián recurtou distancias só un minuto despois, pero de novo María deixaba claro que a vitoria sería para o Bandeira poñendo o 1-4 no 58.

A piques de soar o asubío final, Alba certificou a vitoria visitante co 1-5 definitivo.

Encontro moi desputado desde o inicio no que ambos conxuntos saltaron ó verde sabendo que debían dar o 100% para levar a vitoria.

Adiantouse o PM Friol cun bo gol de Alba Menán, pero a igualdade entre ambos conxuntos deixaba claro que en calquera momento o San Roque podía empatar o encontro. Así, no 51, Paula conseguiu por fin a Isa, a porteira friolesa que salvou ao seu equipo de numerosos goles.

Ambos equipos continuaron tendo ocasións e calquera dos dous estaba preto de anotar. Porén, o partido tivo que pararse ante os improperios dende a grada dun afeccionado, que levaron a que o árbitro aplicase o protocolo, mandara ás xogadoras para os vestiarios e alertase ás autoridades para que identificasen e tomasen as oportunas accións ante o individuo.

Coa reanudación do encontro, o PM Friol saiu desenchufado mentres que, o San Roque, mantivo o ritmo. Así, foi Míriam quen anotaría o 2-1 certificando a vitoria das verdibrancas.