A un mes para que as competicións dean o pistoletazo de saída, o mercado segue activo na nosa provincia. Proba diso é a nova fichaxe do Racing Villalbés. Os de Simón Lamas incorporan ao dianteiro de 20 anos Izan Fernández, que procede do filial do Málaga CF, o Atlético Malagueño. Ademais, cobran importancia as renovacións anunciadas pola SD Burela: Jairo Campo, Simón, Pablo Vila e Álex Esquerdeiro seguirán como locais na Marosa e serán os capitáns do equipo nunha mestura de veteranía e mocidade.

Na mesma categoría que os da Marosa competirá unha SD Pol que mantén o seu ambicioso proxecto. Os do Manuel Luna incorporan ao lateral zurdo Álex Pérez ‘Garza’ e ao dianteiro Omar, que veñen de ascender á Terceira RFEF coa Sarriana. Un recén ascendido, o Guntín, renova o compromiso do vertixinoso extremo Sergio Quiñones.

Na Segunda Galicia, o Cospeito quere redimirse da temporada pasada e procurar o ascenso de novo. Para iso, Jesús, Cancio e Fran Lage renovan na Fonte. Na Terceira Galicia, o recén descendido Goiriz segue a armar un proxecto ambicioso na categoría. Os chairegos incorporan a Héctor Moure, formado na base do Racing Villalbés e que procede do Nuevo Nausti, conxunto da súa parroquia que este ano non sae a competir. O cadro vilalbés tamén suma ao seu proxecto ao mediocentro Miguel ‘Canario’.