O mercado evidencia que as temporadas da Covid-19, onde era difícil sacar un contido diario, son cousa do pasado. A normalidade volveu para quedar nos despachos lucenses, e son moitos os movementos que traemos un día máis. Comezando pola Terceira RFEF, o Polvorín non contará na 23/24 con Pablo Castrín. O de Riotorto despídese do club da súa vida logo dunha segunda etapa na que foi un xogador importante e chegou a entrar en convocatorias co primeiro equipo. Tampouco seguirá no filial albivermello o lateral Luis Castro.
Outro ex do CD Lugo, Fernando Cuadrado, xa é xogador da Sarriana de forma oficial, tal e como apuntou Non Vale Furar hai uns días. O atacante suple así a marcha a Iker Hurtado cara o CSD Arzúa. Na Preferente Norte, o Castro asina a Marco, un zurdo moi cotizado na categoría. O prometedor mediocentro de Xustás vén de facer unha gran campaña no Lemos e retorna ao conxunto que o formou de cativo. Outro zurdo de garantías, Álex Rois, renova na Residencia un ano máis.
Na Primeira Galicia, o Foz xa prepara a nova temporada. Os de Jesús Gayol incorporan xuventude e talento coa chegada de Aarón (xuvenís SD Ribadeo), Anxo (xuvenís SD Ribadeo), Carlos (con pasado na base de Viveiro e Racing Villalbés), Álvaro (Alfoz) e Antón Couto (Ribadeo CF). Pola súa banda, o Guntín di adeus a Heitor, intermitente pero decisivo en varios partidos na pasada campaña, mentres que outro ascendido, a Milagrosa, asina ao gardamallas Chipi, que volve ao equipo no que se formou.
No Chao da Poza, pola súa banda, queren completar unha boa temporada, comandados polo noso Diego Díaz. O incombustible técnico, que chega desde o San Roque, vén de ser anunciado como primeiro adestrador dos minutos na volta do Portomarín á Primeira Galicia. Outro que deixa Montirón é o ariete Dhomini, novo xogador do Riotorto de Manolo García.
Na Segunda Galicia, o filial do Racing Villalbés segue a conformar un equipo de garantías para o seu debut na categoría. Ás renovacións anunciadas onte súmase o mediocentro Anxo, que aportará calidade futbolística e humana ao grupo. Ademais, os chairegos asinan ao lateral zurdo Cumbraos, que chega desde o Castro ‘B’. Preto do río Madalena, o Cabreiros contará por terceira temporada consecutiva co mediocentro pontés Chema. Tamén o Paradela opta polas renovacións, neste caso a do seu técnico, Rubén Bergantiños.
No tocante á zona sur, o Río Sil segue a «pescar» futbolistas na base do Monforte CF. Ademais de Saúl Oviedo, o conxunto suma ao seu proxecto ao mediocentro Manuel Díaz e ao lateral Hugo Pérez. No feminino, o Monteforte di adeus a Elenita, que se desvincula do fútbol para centrarse na súa outra pasión, o motociclismo.
