O mercado segue a deixar titulares nos últimos días. Con algunas competicións xa comezadas e outras a escasas semanas de facelo, as novidades de hoxe concéntranse na parte norte da provincia.

Así, o lateral Ángel cambia a banda da Marosa pola do Martínez Otero. O xogador defenderá a elástica do CD Foz na presente temporada. E precisamente á Marosa chega o gardamallas Saúl Pita, que traballará como adestrador de porteiros do clube burelense. Outro equipo mariñán que viste de verde é a UD Xove Lago. Verde que defenderá un ano máis Maikel, capitán do equipo.

Máis ao sur, Rubén Pena foi anunciado como novo técnico do Xermade e, na comarca da Ulla, a SD Antas contará un ano máis con Miguel. A nosa última parada de hoxe é na Montaña, onde a SD Castroverde renovou a tres caras habituais no once titular: Adri, Bruno e Dani xogarán un ano máis no clube.