Contar co pichichi no teu equipo é un elemento diferencial, pois a capacidade goleadora é un dos factores máis cotizados no fútbol profesional e amateur. Hoxe revisamos quen son os homes máis afortunados de cara ao gol na primeira recta da temporada 2024/2025 nas categorías autonómicas.

O pasado martes conversamos con Jorge Pereira, dianteiro da Residencia. O ariete da Cheda conta con 14 tantos no seu haber, que contribúen sen dúbida á boa situación clasificatoria dos seus na Primeira Futgal. Os de Rafa Casanova, de feito, son segundos e disputarán un duelo vital a próxima semana contra o líder, o Burela de Oke.

Na Segunda Futgal, os datos son ben diferentes no Norte e no Sur. No grupo mariñán, a boa xeira goleadora de Óscar López achegou ao Riotorto CF aos postos de promoción. Un dos «xemelgos» do noso fútbol perforou as mallas rivais en 14 ocasións ao longo de 15 partidos, uns números moi elevados dada a igualdade da categoría. No Sur, pola súa banda, o Brollón mantén a súa loita pola cabeza da táboa, ao igual que o fai o seu ariete Isma, que suma 9 goles en 14 choques disputados. O mesmo número que Rafa, do Ferreira, e Javi, do Becerreá. Porén, os dous últimos xogaron un partido máis que Isma.

Martín é o pichichi do Grupo Sur da 3ª Futgal.

Na Terceira Futgal, o pichichi é Micael Simao. O xogador mantén ao Matela no playoff de ascenso do Grupo Norte. O atacante aventaxa en 5 goles ao seu perseguidor máis inmediato, Raúl. O dianteiro dos de Outeiro de Rei conta xa con 13 goles en 12 partidos. No Sur, os 16 goles de Martín, do Sober, axudan aos seus a manterse na cuarta posición, a tan só un punto do ascenso directo.