Nova derrota das luguesas ante o Bergantiños. Un moi mal partido, sen paliativos, das xogadoras do CD Lugo, que firmaron un dos peores desempeños do equipo en anos.

Aínda que as albivermellas foron superiroes en aspectos tácticos e tamén no dominio da posesión ou incluso conseguindo superar a presión e liñas adiantadas do Bergantiños, non conseguían xerar perigo algún na área rival.

Porén, o Lugo púxose aínda así por diante no luminoso cun gol que chegou con bastante sorte. Pero a tónica do partido fixo xustiza e o Bergantiños empatou o encontro para rematar gañándoo finalmente (2-1).

O CD Lugo amosou unha gran fraxilidade defensiva, algo que non é costume no equipo albivermello, característico sobre todo polo seu bo desempeño nesta faceta do xogo.

As luguesas deben reaccionar axiña se non queren sufrir no tramo final da tempada.

Un partido moi completo das friolesas remata coa vitoria ante o filial do CD Lugo, que tivo máis dificultades en facetas do xogo como a posesión do balón.

O PM Friol xogou coas liñas moi ordenadas para parar o potencial ofensivo das luguesas, que coas liñas adiantadas tentaban facer dano filtrando balóns ás laterais e ás dianteiras.

Porén, as ocasións foron para o PM Friol, que desaproveitou moitas oportunidades para colleitar un resultado máis amplo. «É o derbi, é un partido que sempre apetece xogar pero ao final suma 3 puntos coma os demais. Do que nos ten que servir é para reforzarnso anímicamente. O que si é que destacable é cómo xogamos. Fixemos a idea de partido que queriamos e estamos no bo camiño», dicía Quiroga – adestrador do filial friolés – ao remate do encontro.

As xogadoras do CD Lugo non baixaron os brazos e loitaron durante todo o partido por recurtar diferenzas, e aínda que non fixeron un mal partido, non obtiveron o premio da sorte.

Un partido cun gran ambiente nas gradas que serve de preámbulo para o derbi dos equipos absolutos, PM Friol e CD Lugo, que se enfrontarán na Terceira Federación en apenas 15 días.

Cun triplete de Jenny, outro gol de Elisa e outro de Eva, a SD Antas golea a domicilio ao CF Noia (1-5) nun partido que deixa moi boas sensacións.

As seoanesas gozarían de comodidade e circulación de balón en campo rival. O xogo combinativo e recuperando tras pérdida non daba opcións ao Noia. Tres dos goles da SD Antas chegarían antes do descanso, para rematar o partido con outros dous á volta dos vestiarios.

Un partido cheo de goles entre o San Mateo e a SD Chantada cae finalmente do lado das locais (San Mateo).

A primeira parte tivo dúas tónicas. Durante os primeiros 20 minutos o dominio foi chantadés, que se adiantou grazas a un disparo lonxano de Ángeles. As vermellas querían máis e así seguiron no partido, pero o San Mateo grazas a un pase en profundidade (ou quizabes tan en profundidade que caendo no fóra de xogo) puxo as táboas no marcador e a tónica do partido mudou. O ánimo do San Mateo veuse arriba e fixéronse donas do partido, aínda que sen chegar a ter ocasións claras.

Xa na segunda parte, outro balón á espalda é despexado por Andrea pero o esférico volve caerlle ás atacantes para adiantarse no marcador (2-1). Isto danou a moral da SD Chantada, que non volvería despregar un bo fútbol no que restou de encontro. Así chegou o 3-1, cun gol logo dunha falta lateral. Foi aí cando as locais repregaron, co marcador xa a favor, cedéndolle balón e campo á SD Chantada.

Foi grazas a iso como chegaron os goles de Rocío primeiro e de Ángeles despois para empatar o marcador. Mais lonxe de medrarse a SD Chantada grazas a remontar o partido, foi o San Mateo quen se creceu na casa para afianzar a vitoria. Os últimos 5 minutos, cunha clara dominación do xogo do San Mateo, chegou o erro defensivo das chantadesas para que as locais anotaran o definitivo 4-3, que deixa sen puntuar á SD Chantada.

Aínda que o dominio foi dende o inicio para o cadro visitante, a Milagrosa, foi especialmente na segunda metade cando as xogadoras da Comercial perderon a posición no campo e os erros locais sucedéronse no Rodríguez Lago.

Non foi ata o 53′ cando se abriu a lata dos goles. Lucía Martínez, que salira dende o banco, abría o marcador para a SCD Milagrosa. Tan só catro minutos despois foi Martina Gómez quen puxo o segundo (0-2) e xa no 70′, Noelia Álvarez ampliaba a distancia ós tres goles (0-3), desbotando prácticamente calquera opción da Comercial para levarse o encontro.

Porén, as de Vicky conseguiron recurtar distancias no 75′ grazas a un gol de Katheryn García (1-3). Mais as visitantes volveron pisar o acelerador para que de novo Lucía Martínez anotara o cuarto gol no minuto 81′ (1-4).

Xa ó borde do pitido final, as locais anotaron de novo por medio de Nuria Vázquez (2-4) cun tanto que servía para maquillar un chisco o resultado dun derbi que caeu do lado visitante.

O partido no Catro Ventos só tivo unhas donas, as locais, as «guerreiras» do Carballedo.

Na primeira metade sucedéronse as chegadas con perigo á portería rival do Carballedo, con máis de media ducia de ocasións claras pero que, porén, só conseguiu anotar Paula Bugueiro para adiantar ao Carballedo (1-0). Pola contra, as xogadoras do Arzúa non coñeceron nos primeiros 45′ o terreo preto da portería de Chusa, á que nin sequera lograron achegarse con algo de perigo.

Porén, á volta do descanso o Arzúa saiu con ganas de morder, pero atopáronse coa gardameta local, Chusa, que sacou unha man case máxica para evitar o gol rival.

O Carballedo seguiu atacando para ampliara vitoria. Foi entón cando tras unha xogada moi traballada por Ari, o balón chega a Ana Lamas, quen golpea e anota un auténtico golazo.

Coa vitoria no peto, o Carballedo pensa xa no Ordes, seguinte rival a bater.

«Va como un pepino» diría Beatriz Pérez Aranda se relatara a tempada do San Lázaro, que nos 8 partidos desputados da liga aínda non coñece a derrota.

Na visita desta fin de semana á Tilleira, no Val do Dubra, seguiuse o guion habitual. Aínda que o campo era pequeno e dificultaba xogar, máis aínda cando as rivais estaban metidas atrás cunha liña defensiva de 5 xogadoras.

Porén, grazas ó balón parado o San Lázaro abriu o partido cun gol de Mireia Argüello no 35′. Tamén o segundo tanto chegaría nunha xogada a balón parado, pero desta volta, xa despois do paso polos vestiarios, sería Anita Carballo quen ampliara a distancia no marcador (0-2).

Na segunda parte o San Lázaro conseguía xa romper a liña defensiva plantexada polo Dubra, atacando mellor. Así chegaron os outros dous goles do encontro, primeiro foi Emily quen poría o 0-3 no 79′ e despois, de novo Mireia, aparecería no 80′ para pechar definitivamente o marcador poñendo o 0-4 final.

Pola súa parte, o Dubra tivo un par de ocasións claras, pero atopáronse en fronte cunha gran Jesica Ferreiro que impediu que o balón entrara na súa portería.

Con esta nova vitoria o San Lázaro segue de preto á UD Santiso na loita polo liderato.

Pasaran aínda uns segundos dende o pitido inicial do encontro cando Nerea Pereiro decidiu que o partido se ía pechar pola vía rápida, anotando para adiantar ás locais (1-0).

Porén, o Órdenes non mercou a idea e puxo o empate no luminoso tan só 5 minutos despois, cun gol de Anabel Carreño.

Dende ese momento e ata preto do descanso, o marcador non se moveu. Foi entón cando o Monte Forte deu a estacada de novo grazas a un tanto de Laura Correas, ‘Moji’ (2-1). Pero xusto na seguinte xogada, un penalti provocado polo Monte Forte devolvía a oportunidade ó Órdenes de poñer as táboas no luminoso. O lanzamento é atallado pola porteira local, Camila, mais o colexiado manda repetir o penalti ó estar a gardameta adiantada no momento do golpeo. Nova oportunidade para o Órdenes, que tira de novo dende a pena máxima pero o disparo marcha fóra.

Xa á volta do vestiario, o Monte Forte saiu mellor ó encontro, con máis concentración, o que lles permitiu dominar os segundos 45′ minutos do encontro. O partido pechouse definitivamente no 77′, cando de novo Laura Correas, ‘Moji’, poría o 3-1 final e faríase cun dobrete na súa conta particular.