Segunda xornada consecutiva con doble triunfo lucense na Terceira. Polvorín e Racing Vilalbés, os dous como locais, acadaron dúas importantes vitorias ante Barco e Laracha respectivamente. Na Preferente, triunfo pola mínima do Viveiro que amplía diferencias cos seus perseguidores, e do Ribadeo, que gañou no campo do Noia, terceiro clasificado. A Sarriana cedeu un empate na Ribela, mentras que o Foz saiu goleado do campo do San Tirso e o Castro perdeu ante o Puebla nun bo encontro.
O Polvorín deu un paso de xigante cara a permanencia. O filial albivermello venceu na Cheda ao Barco (2-1), conxunto que aspira a entrar na fase de ascenso. O equipo adestrado por José Durán foi xusto vencedor, nun encontro no que contou con máis e mellores ocasións para marcar. Malia todo, foron os de Valdeorras os que se adiantaron no marcador por medio de Ivi Vales, logo dunha gran xogada combinativa. O Polvorín, que xa gozara de opcións de gol por medio de Matías, seguiu tentándoo, e Antón Escobar a piques estivo de logralo. Xa na segunda metade, Cuadrado acadou o empate nunha boa xogada individual, e a falta dun cuarto de hora para o final, Juan Brunet culminou a remontada.
Quinta xornada sen perder e segundo triunfo consecutivo dun Racing Vilalbés que sae de descenso. Desta volta, derrotou na Madalena ao Laracha (2-1). Xornada de reecontros, Óscar Gilsanz voltou ao feudo racinguista, desta volta no banco rival e o central Antonio, baluarte na pasada temporada foi titular ante o seu ex equipo. Foi un encontro equilibrado e sen moitas ocasións. Jose Varela protagonizou a xogada do partido na primeira metade, pero o seu disparo foi desviado a córner polo gardameta rival. No saque de curruncho, o colexiado sinalou penalti sobre Make, e Álex Pérez non errou. O coruñés leva sete tantos nesta campaña. O Laracha conseguiu empatar nun córner que Adri Castro cabeceou a gol. Xa na segunda metade, Santi Taboada, desde dentro da área conectou un potente disparo que se colou na meta visitante. O vilalbés Víctor Eimil no lateral dereito e o sarriao Iago Castro no centro da defensa xogaron os noventa minutos no cadro da Laracha.
O Viveiro acadou o seu sexto triunfo consecutivo. Foi en Cantarrana ante o Atlético Coruña Montañeros (1-0). Os mariñáns comezaron enchufados e Álex Meitín xa puido facelo primeiro aos dez minutos, pero pouco despois, nun lanzamento de córner, Roi cabecea marcando o único tanto do encontro. Ámbolos conxuntos gozaron de ocasións para marcar na primeira metade pero non estiveron acertados. Na reanudación Marino puido sentenciar pero non estivo acertado e o Montañeros apretou estando a pique de acadalo empate. Kiko e Roi salvaron aos seus nos derradeiros minutos.
A Sarriana non pasou do empate na Ribela ante un correoso Boimorto (2-2). Na primeira metade viuse superado polo seu rival e practicamente non contou con ocasións para facer gol. Os visitantes adiantáronse cun golazo de Óscar e puideron incrementala diferencia pero Javi López evitouno cunha boa parada. Nada máis comezala segunda metade, o Boimorto fai o segundo nunha xogada con varios rebotes. A Sarriana nos segundos corenta e cinco minutos foi superior ao rival e chegou con perigo á porta dos coruñeses. Marzán recurtou diferencias de penalti e Quiroga igualou a contenda tras superar no un contra un ao gardameta. Nos últimos compases, Diego Núñez tivo nas súas botas a remontada.
O Ribadeo prolonga a súa racha, e foi quen de vencer no campo do Noia, terceiro clasificado (2-3). Partido moi serio dos de Rafa Casanova, que cederon o balón ao rival, pero que tiveron o encontro controlado e apenas sufriron ocasións claras de gol. Luki, nunha contra, adiantou aos mariñáns na primeira metade e Poratti ampliou diferencias na segunda, logo de que o seu disparo batese nun defensa e despistase a Pajarillo. Fernando evitou o gol local tras unha mala saída de Hugo, e Aitor en dúas contras claras puido sentenciar, pero non tomou a mellor decisión. No único erro defensivo ribadense, Nando aproveitou un bo centro de Hugo para recurtar diferencias. Cos de Pose volcados a polo empate, o recén incorporado Vizoso fixo o gol da sentencia xa no minuto noventa. A piques de escoitalo silbido final, Dani Conde puxo o definitivo 2-3.
Mal encontro e peor resultado do Foz na súa visita ao campo do San Tirso, onde caeu derrotado por catro goles a un. O cadro local supera aos de Gayol na clasificación. Os focenses non estiveron no partido en ningún momento e xogaron toda a segunda metade cun home menos, logo de ver Asier o cartón vermello directo. Un gol en propia porta de Javi Chinchón antes do primeiro cuarto de hora e outro de Fran González deixaron o encontro encarrilado para o San Tirso na primeira metade. Na reanudación, xa cun home menos, os de Gayol, que tamén rematou expulsado, apenas tiveron opcións de meterse no partido. Xián fixo o terceiro e pouco despois, un defensa do San Tirso anotou na súa portería dando un fío de esperanza aos mariñáns. Sen embargo, non existiu a posibilidade de inquedala meta local, chegando o cuarto e definitivo poucos minutos despois.
Derrota do Castro no campo da Alta ante o Puebla (1-0). Outro encontro esperanzador dos de Brais Prados, que só encaixaron de penalti, a falta de dous minutos para o final. Os chairegos aguantaron as embestidas dos do Barbanza sen demasiados apuros, pero no último tramo de partido, o colexiado sinalou penalti sobre Espi, que Viturro transformou, esfumando as opcións de puntuar do Castro.
