Os sobranceiros da Terceira na décimo cuarta xornada

A piques de rematar o ano, rematou tamén a primeira fase da competición na Terceira Galicia. Oito equipos clasificáronse para a fase polo ascenso e xogarán unha liga a dobre volta como se decidiu antes do comezo da temporada. Os dezaseis equipos restantes (se ningún deles decide abandonala competición) dividiranse en dous grupos, o primeiro clasificado de cada grupo loitará polo Trofeo Delegación de Lugo. O gañador tamén ascenderá á Segunda Galicia.

No grupo norte, o Cervo, o Goiriz e o Catro Roldas tentarán subir de categoría. O Cervo confirmou o seu primeiro posto, despois de vencer ao Cazás nun gran partido de Samuelito que fixo fronte a gran actuación de Palito e Fernando no equipo local. O Goiriz rematou como segundo ao empatar no Pichón ante un Muimenta que tivo en Jairo un dos xogadores máis destacados. Aproveitouse o conxunto adestrado por Cora da derrota do Catro Roldas que fixo probaturas na súa visita ao Rioaveso e caeu pola mínima nunha boa actuación de Iván Arias. No duelo mariñán o Celta Barreiros, que tivo en Guti,  Djibi e Ayoub aos seus futbolistas máis activos, venceu a un Celeiro no que rematou a etapa de Óscar como adestrador e Martín Rodríguez volverá dirixir ó equipo.

No grupo centro, a Fonsagrada, o Corgo e a Comercial tamén estarán na fase polo ascenso. Na última xornada decidíase o campión do grupo no encontro entre o Fonsagrada e o Corgo que o árbitro suspendeu nos últimos minutos. Non obstante, ese partido íao gañando o Fonsagrada por 2-o e os minutos que restan, nun principio, non se van disputar por acordo entre os clubes. Polo tanto o Fonsagrada é o primeiro e o Corgo é o segundo. Terceira foi a Comercial que venceu con claridade ao Friol B (queda con dez puntos na súa primeira temporada) cunha destacada actuación do central Kafú. O Guntín venceu a un Rábade que fixo 16 puntos na súa primeira competición oficial. O Laxosa descansou e finaliza o campionato sen poder conseguir ningunha vitoria.

No grupo sur, o Incio e o Sober serán os dous equipos que buscarán estar o ano que vén na Segunda Galicia. O Incio xa tiña sentenciado o primeiro posto e empatou na última xornada diante do Río Sil. Segundo foi o Sober que derrotou con claridade ao FC Becerreá nun encontro que xa sentenciou na primeira metade. No outro partido do grupo, o Paradela venceu a domicilio ao Relámpago Taboada. O Quiroga foi o equipo que lle tocou descansar na derradeira fin de semana do ano con fútbol de Terceira no 2017.

Comparte

Sobre o autor Ver todos os posts

Iván Calaza

Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

2 ComentariosDeixa un Comentario

  • Moitas grazas por nomearme como o golazo da xornada ainda que me gustaría saber si é polo primeiro ou polo segundo gol que marquei neste partido contra o Catro Roldas. É un placer formar parte de esta páxina tan fenomenal. Un saúdo e que sigades así.

Deixa un Comentario

O teu Email non se publicará. Cubre os campos requeridos*