A penúltima xornada da Segunda Rexional resolveu os ascensos no grupo norte. O Folgueiro e o Lourenzá non fallaron. Xa son equipos da Primeira Autonómica. Pelexarán esta fin de semana por selo campión. Na zona baixa, o Cervo descendeu á Terceira. O Valadouro e a Comercial xogaranse a outra praza. Aínda que nestes momentos, por arrastres, descenderían os dous. Non se decidiu nada no grupo sur. Na última xornada o Guntín, o Palas e o San Roque dependerán de si mesmos para subir. O Oural e o San Lázaro tamén teñen algunha opción. O Becerreá e o Sporting Lucense loitan pola salvación. Un dos dous caerá a postos de descenso directo á espera de se hai algún arrastre.

No grupo norte, o partido no que practicamente se decidía todo quedou na casa. O Folgueiro derrotou no Boavista ao Guitiriz. Subiu de categoría e deixou ao seu rival sen opcións. O cadro adestrado por Anxo soubo xestionar ben a presión. O Guitiriz xerou boas oportunidades pero non estivo tan acertado. Non faltou a súa cita co gol Aurelio. Leva 32. Tampouco lle foi infiel ao gol, Iván Recalde. Marcou o da vitoria do Lourenzá ante o Cabreiros. Foi de penalti e con expulsión do porteiro incluída. No seu caso suma 29 tantos. Tres puntos que tamén significan o regreso á Primeira. O cadro local non tiña nada importante en xogo. Xogou sen oito dos habituais. Rematará a temporada na sexta praza.

Na zona baixa, o Cervo certificou o seu descenso de categoría. As posibilidades xa eran poucas. E o equipo viuse superado polo Meira. O cadro meirego quere ser sétimo. O Cospeito deu un paso case definitivo pola permanencia. Derrotou no duelo directo ao Valadouro. Non vai baixar do 13º porque ten o gol avarage favorable con respecto á Comercial (35 goles de diferenza no global). Só tería perigo no caso de que houbese dous arrastres. Situación pouco probable per posible. Pola súa banda o Valadouro ten un punto menos ca á Comercial. O conxunto da capital lucense superouno na clasificación ao vencer ao Xermade. De pouco lle valeu ao cadro xermadino o bo gol de Diego Pellón. A Comercial tentará evitar o posto de descenso directo na última xornada e terá que estar pendente dos arrastres. Coa situación nestes momentos, baixaría de división.

En principio, ningún do resto de equipos debera ter problema por manter a categoría. Só a Candelaria podería ter unha hipotética posibilidade de descenso. A pasada xornada empatou co Goiriz ao que supera en tres puntos na clasificación. Un hipotético empate a 32 puntos entre a Candelaria, o Goiriz e o Cospeito deixaría o cadro adestrado por Abel Eijo na 13ª posición. Posto no que sería arrastrado no caso de que haxa dous arrastres dende a Primeira que caian para o norte da Segunda. Repetimos, moi hipotético este caso. Noutros partidos da xornada sen nada importante en xogo, o Abadín e o Iberia empataron a dous goles. O cadro local xogou sen porteiro natural. Jony púxose baixo paus. Foi expulsado e Carra colleu as luvas no resto do partido. Noutro partido a priori sen gran valor clasificatorio, o Roupar venceu pola mínima ante o Mondoñedo. Os pupilos adestrados por Diego Dopico teñen opcións de acabar a liga na terceira posición.

No grupo sur, a xornada estivo condicionada polas derrotas de dous equipos da zona alta. Aínda así, o Palas e o San Roque se gañan, ascenden. Non obstante, o líder en solitario agora é o Guntín. Venceu a domicilio ao Monterroso B. Seis vitorias consecutivas. Semella que volveu ao liderado no momento axeitado. Non era líder dende a xornada 9. As súas opcións pasan por un deses partidos de liga que se converte en final. Xoga no Ladairo co Palas. O empate válelle aos locais. O cadro da Ulloa perdeu nos Chacotes co San Lázaro. Juanjo conseguiu igualar os dous goles de desvantaxe. Pero nos últimos intres a vitoria foi para os visitantes. O cadro adestrado por Quintela terá que gañar para ascender. O resultado deulle opcións de ascenso ao San Lázaro. Moi remotas, pero existentes. As opcións pasan por gañar, que perdan o Palas e o San Roque e que non gañe o Oural. Aválano os 11 partidos seguidos que leva sen perder. Si depende de si mesmo o San Roque. A pesar de perder no campo do Becerreá. De pouco serviu que se adiantara no marcador. Javi e Alejo deixaron tres puntos vitais na casa. O San Roque ascende se gaña no seu último partido polo duelo directo que van ter o Guntín e o Palas. Opcións tamén ten o Oural. Derrotou ao Chantada B e uniu a segunda vitoria seguida. Precisa gañar e que perdan o Palas e o San Roque.

Na zona baixa, xa co descenso confirmado do filial do Monteroso B. A outra praza vai ser para o Sporting Lucense ou a SD Becerreá. Ambos gañaron nesta xornada. De si mesmo depende o cadro de Becerreá. Venceu na vitoria xa comentada co San Roque. O seu rival derrotou a domicilio ao Bóveda. Só un hipotético arrastra da Primeira para este grupo provocaría que o 14º non se salvase. Quen xa respiran aliviados son o Brollón e o Santa Comba. O equipo dos Medos venceu pola mínima ao Ferreira. Tamén por un gol de diferenza derrotou o Santa Comba ao Corgo. No único partido sen nada importante en xogo, o Incio e o Portomarín empataron. Un punto que mantén aos dous na pelexa pola sétima praza.

Comparte

Sobre o autor Ver todos os posts

Iván Calaza

Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Deixa un Comentario

O teu Email non se publicará. Cubre os campos requeridos*