A primeira rolda da Copa 2019 da Segunda e da Terceira Autonómica deixou un partido suspendido. Tres equipos accederon aos dezaseisavos de final na quenda de penaltis. Nos duelos entre conxuntos de distintas categorías, saíron vitoriosos os de Segunda. O Cazás agarda rival en oitavos.

Na zona norte, a maior emoción estivo na Fonte e no Municipal de San Lourenzo de Aguiar. O Cospeito e o Roupar igualaron a un gol. Nos penaltis acertou máis o conxunto xermadino. Non realizou un gran encontro pero o gol de Jaco Ares deulles o pase. Agora protagonizará unha das grandes eliminatorias dos oitavos. Recibirá na casa ao Guitiriz (terceiro e cuarto no grupo norte da Segunda Rexional). Tamén se decidiu nos penaltis o duelo entre o Matela e o Mondoñedo. Empataron sen goles. Manu Pardo sacou un man a man preto da recta final e detivo un penalti decisivo na quenda. Pola súa banda, a Comercial avanzou de rolda na mesma finde na que coñeceu que descendía á Terceira. Xa se coñecía o arrastre do Castro na Preferente. Esa situación afecta xa matematicamente ao descenso do Sanci na Primeira que cae para o grupo norte da Segunda. Polo que a Comercial baixa de categoría un ano despois do seu ascenso. Aínda así, continúa na Copa. Superou no Cascabeiro ao recén ascendido Celta Barreiros. O encontro foi o último partido de Álvaro coa camisola celeste. Cando menos polo momento. Motivos laborais impídenlle continuar a unha das pezas centrais do proxecto do equipo de San Cosme. A Candelaria xa agarda na Granda pola Comercial nos oitavos.

Hai xogadores que non perden o olfato coa chegada da Copa. Seijo marcou os tres goles do Abadín no seu triunfo ante o Cervo. O Municipal xa agarda polos oitavos ante o Cabreiros. O Catro Roldas levou a súa segunda decpeción seguida en sete días. Fíxolle fronte ao Meira pero os visitantes venceron pola mínima na Canteira. O cadro meirego volve ter unha saída complicada. A seguinte rolda vaina xogar no Suso Cruz ante o Lourenzá.

Na zona sur, o partido entre o Castroverde e o Santa Comba suspendeuse na segunda metade cando o resultado era de 2-5. Co mesmo resultado deuse por decidida a eliminatoria na valoración do Comité. Segundo a acta, o Castroverde non chamou á Garda Civil cando así o requeriu o colexiado por unha situación que se estaba dando no campo. Considerou que había risco para a súa integridade física e parou o xogo. O Santa Comba xogará os oitavos co Oural. Pola súa banda, a maior emoción futbolística da zona estivo na Carqueixa. O Río Sil e o San Lázaro marcaron tres goles cada un. A quenda de penaltis clasificou ao cadro adestrado por Diego Rey. Iso que Quevedo foi quen de deter tres penaltis.

O Guntín continúa coa inercia positiva, aínda que a piques estivo de relaxarse en exceso ante o Sporting Lucense. Venceu cun gol de Jony. O Ladairo acollerá encontro dos seus por terceira semana seguida. O rival será o Ferreira. Tamén pasou de rolda o Palas. Derrotou ao Monterroso B no derbi da Ulloa. Desprazarase a Sober para xogar os oitavos.

A rolda dos dezaseisavos de final será a que maior número de equipos xunte nesta Copa 2019 da 2ª e da 3ª. Varios equipos pasaron exentos a esta fase. Algúns procedentes da fase previa que se xogou na Terceira Rexional. Só un saltará esta eliminatoria. O Cazás xa está en oitavos pola renuncia á competición do Valadouro. O seu rival sairá do duelo entre a Candelaria e Comercial.

Nota: As aparicións nesta entrega dos “Onces Futbolinlugo” xa non contan para as puntuacións do “All Star Futbolinlugo”. En breves días publicaremos os xogadores con máis aparicións e a súa consecuente convocatoria para desfrutar xogando da festa do fútbol lucense.

Comparte

Sobre o autor Ver todos os posts

Iván Calaza

Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Deixa un Comentario

O teu Email non se publicará. Cubre os campos requeridos*