Os xogadores máis destacados da fin de semana teñen o seu espazo no once de Futbolinlugo. Unha xornada sen derbis, na que o fútbol lucense só tivo dúas vitorias. O Lugo B mantense en postos de ascenso despois da seu triunfo ante un rival directo como o Sofán. O equipo de José Durán venceu fóra da casa por 0-2 con Cuadrado, Duque (que foron os goleadores) e Cacharrón como xogadores máis sobranceiros. O Lugo B está a seis puntos da promoción de ascenso directo e empatado a puntos co quinto e o sexto clasificado. Pola súa banda, o Escairón derrotou por 3-1 ao Soneira e aséntase na zona media da táboa clasificatoria. Denis e Calo, con dous goles, foron os grandes protagonistas do enfrontamento no Muncipal do Saviñao.

Os conxuntos da Mariña perderon comba neste semana. O Viveiro perdeu na súa visita a Arteixo por 2-0 e queda a cinco puntos da promoción de ascenso. Á mesma distancia está o Ribadeo que non pasou do empate no Pepe Barrera ante o Mugardos. O conxunto da Mariña Oriental cortou a súa xeira de vitorias, aínda que segue na pelexa polo play-off.

Peores lles foron os enfrontamentos aos equipos da zona baixa. O Lemos continúa cos seus malos resultados e, a pesar de aguantar o empate ata os últimos minutos, acabou perdendo na casa do líder, o Noia por 1-0. Tamén perdeu o Chantada por 1-3 ante o Laracha e está dous puntos por riba da salvación pero en zona de perigo polos posibles arrastres. A Sarriana colleitou unha nova derrota ante un dos grandes da categoría, o Estudiantil por 1-4. O equipo da Ribela segue en descenso a seis dunha salvación que aínda pode estar máis lonxe se se producen arrastres de categorías superiores.