O Trío de Ases da xornada 12 déixanos ao Polvorín fóra da zona de descenso tras derrotar ao Somozas na Cheda. O Racing Vilalbés caeu na Madalena ante o Compostela. Na Preferente o Viveiro gañou comodamente ao Puebla, mentres que o Ribadeo derrotou ao Foz no derbi mariñán. A Sarriana gañoulle ao Laracha, a Residencia ao Sigüeiro e o Lemos cunha remontada épica sumou tres puntos ante o Arteixo.
O Racing Vilalbés non puido coa pegada da SD Compostela e caeu na Madalena (0-2). Ráchase a xeira de catro encontros sen perder dos chairegos, que lle plantou cara aos santiagueses. Na primeira metade Cuadrado tivo a ocasión máis clara para o cadro local, cun lanzamento desde fóra da área, pero atopouse coa boa intervención do ‘Pato’ Guillén. Tamén tivo que intervir Javi Pita, para salvar un man a man ante Brais Abelenda. A segunda metade seguiu a mesma tónica, co Racing presionando a saída de balón do Compostela para tentar saír á contra. Pero foron os de Iago Iglesias quenes se adiantaron no marcador. Samu, cun disparo desde a frontal superou a Javi Pita logo de que o esférico fixese un efecto estrano. Puideron empatar os locales a balón parado. Nun saque de córner unha triple ocasión rematou cun tiro de Make. O Compos sentenciou por medio de Primo, na súa reestrea. Xa marcara na Madalena na derrota dos seus ante o Racing fai dúas temporadas. Primeiro triunfo compostelanista na Madalena na era Iago Iglesias. O monterrosino Pablo Antas entrou na segunda metade.
Un tanto de Manu Núñez sirviulle serviulle ao Polvorín para gañarlle ao Somozas (1-0). Bo encontro o realizado polo filial albivermello. Embotellou ao seu rival na maioría do encontro, salvo nos compases finais cando os de Ferrolterra tentaron acadar o empate. José Durán trocou o sistema e deulle os froitos agardados. Dominou o partido a través da posesión e gozou de ocasións claras por medio de Antón Escobar e Marcos, pero o gol non chegou ata preto do descanso por medio de Manu Núñez. Na segunda metade os lucenses xogaron máis replegados e saíron á contra con certo perigo con Antón Escobar, Rayco e Chiqui. Nos últimos compases, o Somozas tentou a igualada, pero non inquietou a meta de Julen. O cadro lucense sae así dos postos de descenso.
O Viveiro sentenciou ao Puebla na primeira metade (0-3). Semellaba un encontro complexo a visita ao campo da Alta, ante un conxunto ben clasificado e cunha das mellores defensas da categoría, pero aos mariñáns sobráronlles corenta e cinco minutos. Nun gran primeiro tempo deixaron o encontro visto para sentencia. Álex Meitín foi derrubado na áera e Xaime, desde o punto de penalti, abriu a lata. Antes da media hora de partido, Marino ampliou as diferencias logo dun pase de Álex Meitín, e antes do intermedio o pichichi Gerardo sentenciou o choque. Na segunda metade, as poucas esperanzas dos de Anxo Casalderrey viñéronse abaixo coa expulsión de Carlos Lugo. Á contra os de Chusky puideron ampliar as diferencias.
O Ribadeo venceu no derbi mariñán ao Foz e engánchase aos postos de privilexio (2-4). Os de Rafa Casanova gañaron no Martínez Otero e miran de reollo os postos de ascenso. Nuns primeiros compases igualados, o cadro local adiantouse por medio de Álex Paz, que aproveitou un resbalón de Mario para superar a Hugo. O Ribadeo non tardou en reaccionar e Brais empatou cun testarazo á saída dun córner. Antes do intermedio, Aitor deulle a volta ao marcador nunha contra aproveitando o pase de Criss. Xa na segunda metade invertíronse os papeles. Criss marcou e Aitor asistiu. Sentenciou o encontro Luki logo dun malentendido da defensa focense e Manu Pardo. Preto do final, Jesús Pablo recurtou diferencias ao rematar un saque desde o curruncho. Os de Jesús Gayol, que perderon catro dos últimos cinco encontros, quedan na zona baixa da clasificación.
A Sarriana derrotou ao Laracha e suma catro xornadas sen perder (2-1). Non foi doada a vitoria ante un conxunto nunha gran crise de resultados, pero cun potencial fóra de toda dúbida. Logo dunha primeira metade igualada, Mauro inaugurou o marcador moi preto do descanso. O disparo de Héctor rexeitouno De la Fuente e o dianteiro lucense, moi atento, empurrou o balón ao fondo da portería. Na segunda metade, o Laracha quedou con dez pola expulsión con vermello directo de Jairo, que derrubou a Álvaro cando se plantaba só na área rival. Malia todo, Geri logrou a igualada cun potente disparo. Pero Keko tiña unha bala gardada e aproveitou un balón solto na área para anotar o segundo tanto que valeu tres puntos.
O Lemos remontou in extremis e logrou unha importante vitoria ante o Arteixo (3-2). Éxtase na Pinguela cunha remontada épica dos de Edu Rodríguez. César e Gonzalo Torres tiveron opcións de adiantar aos monfortinos, pero foron os visitantes cun tanto de Rubén os que comezaron por diante. O adestrador lemista moveu o banco no descanso e os trocos foron transcendentais. Tan só catro minutos tardou en chegar o empate cun tanto de Gonzalo Torres, pero Miguel Taibo voltou a poñer o marcador do lado do Arteixo. Aínda non estaba sobre o céspede o ourensán Tazos. Un tanto seu no 87 igualou a contenda, pero xa co tempo cumprido un disparo desde preto de setenta metros colouse na meta dun adiantado Javi Rumbo. Con catro triunfos nos últimos cinco encontros, o Lemos xa se sitúa na metade da clasificación.
O triunfo da Residencia ante o Sigüeiro racha a mala xeira dos Álvaro Meilán (2-1). Vitoria moi importante e moi traballada do conxunto lucense. Os visitantes foron mellores na primeria metade e tiveron opcións de adiantarse no marcador. Os veteráns Juanito e Adán puxeron a proba en varias ocasións a Diego Bravos, pero o gardameta resolveu con éxito a situación. Moi preto do descanso Dani Galán aproveitou un rexeite dentro da área para adiantar aos seus. Na segunda metade unha acción desafortunada de Mateo, defensor do Sigüeiro, que introduciu o balón na súa portería, deulle un balón de osíxeno á Residencia. Recurtaron diferencias os visitantes nos compases finais, pero o triunfo non correu perigo.
