O Ribadeo afronta a temporada que está a piques de comezar en Primeira Futgal, categoría na que os mariñáns partirán co cartel de favoritos ao ascenso. Coa ansia de axudar a lograr o obxectivo retorna ao club Santi, un dos grandes baluartes da última década no cadro ribadense, logo dunha temporada lonxe dos terreos de xogo. Ademáis adestrará ao conxunto xuvenil da SD Ribadeo.

Falamos con él acerca do seu retorno, da nova temporada e tamén dos obxectivos do Ribadeo FC.

FUTBOLINLUGO: Como se deu a posibilidade de volver a formar parte do Ribadeo?

SANTI: Seguía tendo gañas de xogar, non me sentía un ex futbolista. Por motivos laborais estaba lonxe e con moitos desprazamentos e tiven que parar. Este ano vou traballar preto da casa e iso fai que poda adestrar con continuidade e aínda me atopo con forzas e gañas de axudar en todo o que poda.

FIL: Unha vez avanzada a pretemporada, como te atopas sobre o terreo de xogo?

S: A verdade é que moi agusto. Tiven un pinchazo no partido co Vegadeo que me fixo parar unha semana, pero agora xa me recuperei e estou moi contento. Gústame moito a proposta do corpo técnico, os adestramentos son intensos e amenos e creo que estamos todos con moitas gañas de comezar xa a liga.

«A motivación ten que ser devolver ao Ribadeo á Preferente»

FIL: Retornas ao Ribadeo nunha categoría nova para ti. Como agardas que transcorra a Primeira Futgal?

S: Nunca fun dos que controlaban demasiado aos equipos rivais, como fai algún compañeiro. Agardo unha temporada dura e complexa na que temos claro que queremos estar arriba. Imos ter que facer moitos puntos, o que implica ser un equipo serio, que non conceda e que erre moi pouco.

FIL: O Ribadeo, só por historia, é un firme candidato a pelexar polo ascenso. Consideras que é o gran obxectivo?

S: Está claro que o obxectivo ten que ser o ascenso, non cabe duda. Iso non quere decir que sexamos os favoritos, pero si que a mentalidade ten que ser gañadora e cada partido debemos saír a polos tres puntos. Logo será difícil porque hai equipos moi ben preparados e só ascende un. A motivación ten que ser devolver ao Ribadeo a Preferente.

FIL: Chegaron moitos xogadores novos á plantilla. Como ves a súa adaptación?

S: Aínda que sone a tópico é un grupo moi bo. Hai moita xuventude e iso tradúcese en gañas, motivación e ambición que fan que os adestramentos teñan moito nivel. Creo que temos un grupo unido e forte e iso é clave para poder remontar os malos momentos, que tamén os teremos.

FIL: Pouco a pouco o Ribadeo xira cara unha política de máis canteira. Paréceche o modelo adecuado?

S: É unha pregunta un pouco trampa. Non creo que ningún equipo, e menos nestas condicións, rexeite xogadores polo feito de ser do pobo. Seguramente a directiva estaría encantada de contar con vinte xogadores de Ribadeo, igual que o resto de equipos de telos do seu pobo. Pero a realidade é que agora o xogador ten moi pouca paciencia e queremos saír de xuvenís e ser titulares en Preferente ou en Terceira RFEF. Debemos ter en conta que iso é moi complicado. Antes había outra mentalidade e outra ilusión no futbolista.

Meu irmán Coki por exemplo, e eu mesmo, non xogabamos con asiduidade no Real Tapia ata os 22 ou 23 anos. Adestrabamos catro días á semana e moitas veces non iamos nin convocados. Calquera da miña xeración que xogase ao fútbol pode confirmar que isto cambiou moito. Boto de menos esas gañas e ilusión por adestrar, xogar e ser mellor cada día e seguir pelexando. Falo en xera, porque está claro que hai excepcións. Hai xeracións que saen da base e siguen xogando e outras non. Eu estou encantando de ver ao maior número de veciños posibles defendendo a camiseta do Ribadeo.

FIL: Foz, Xove Lago, Lourenzá, Iberia . . . vai haber varios encontros de proximidade. Pode esta circunstancia axudar a recuperar a afección no Pepe Barrera?

S: Creo que é un dos maiores alicientes desta temporada. Hai moitos derbis e no resto de partidos imaxino que tamén se achegará xente dos equipos veciños que xogan fóra a poder ver aos rivais da mesma liga. Agardo moita xente no Pepe Barrera, que se vexan bos partidos e disfrutemos dun gran ano de fútbol.