O IV All Star chega con moita forza. Para quen teña mono de fútbol, temos preparada unha xornada moi intensa, chea de emocións e de competición. Porén, a edición deste 2024 presenta unha serie de novidades con respecto ás previas.
En primeiro lugar, recuperamos o horario implantado en Burela hai 5 anos. Os dous partidos —masculino e feminino— terán lugar pola tarde. Por outra banda, incorporamos a colaboración de BMS Sport Health, que amenizarán toda a tarde con actividades para os máis pequenos e, ademais, permitirán innovar nos concursos.
Un dos platos fortes chegará despois do partido masculino. A Fan Zone que teremos ao longo de toda a xornada no Ladairo transformarase nunha festa, con DJ, comida e bebida, á que estades todos convidados. Deste xeito, a tarde do sábado 22 queda repartida do seguinte xeito:
16.00: Partido feminino entre a selección Lugo Sur, dirixida por Pili Neira e Dani Abelairas e a selección Lugo Norte, adestrada por Romina Dadín e Joaquín Blanco.
18.30: Concursos. Futgolf, Chutómetro e Malla de Precisión. A inscrición está aberta ata o venres 21 e todo o mundo pode participar: adestradores, xogadores, afeccionados…. Toda a información ao respecto está aquí.
19.45: Partido Masculino entre a Selección de Preferente e Terceira, dirixida por Adrián Laureda e Rubén Acevedo, e o combinado de Primeira e Segunda, adestrado por Roberto Fernández e ‘Moro’ Fuente.
22.00: Comezo da Gran Festa do Fútbol Lucense, ata que vós queirades!
Máis sorpresas no Iv all star
Todo o evento intercalará momentos de música, merecidas homenaxes a xogadores que se retiran, sorteos de material deportivo e outras moitas sorpresas que descubriredes alí. Contamos con vós.
