A Copa 2019 dálle entrada aos equipos da Preferente que veñen de rematala competición regular. Os conxuntos da Primeira acóllenos nos oitavos de final. Aínda que non se misturan de cheo. A Sarriana e o Ribadeo xogaran entre si o pase aos cuartos. O Viveiro renunciou a competición para centrarse na eliminatoria ante o Barbadás de mellores terceiros da Preferente. No caso do Castro e do Foz si xogan con rivais que militaron esta tempada na Primeira. O Castro ante o Páramo e o Foz co Lemos.
O caso do cadro focense é particular. Por iso destacamos o seu partido esta xornada, aínda que o encontro non sexa o máis importante para eles. O cadro adestrado por Gayol desparazarase a Pinguela para xogar co recén ascendido Lemos. Un rival co que o ano pasado pelexou de ti a ti para ascender á Preferente. Pero a mente do Foz estará noutros puntos de España. Principalmente en Alcoi e en Jaén. Por alí pasan agora as súas opcións de salvación.
E que os temidos arrastres fixeron dano. O Foz rematou a pasada finde a liga regular no grupo 1 da Preferente. Conseguiu 48 puntos. A pesar diso, neste intres son insuficientes. A 15ª posición que ocupa é posto de arrastre polo momento. A salvación pasa pola permanencia do Celta B na Segunda B e o ascenso dun equipo galego da Terceira á categoría de bronce. Algo que xa se podería dar este domingo. O filial do Celta xoga unha eliminatoria a dobre partido ante o Alcoyano que é considerada unha final. Se a supera permanece, senón baixa á Terceira. O cadro celeste viaxa ao partido de volta con vantaxe (1-0), pero El Collao ditará sentencia (domingo ás 18:00 horas). Pola outra banda, o Racing de Ferrol xoga a eliminatoria dos campións. Se a supera ascende á Segunda B. Senón aínda caería na repesca e tería unha nova oportunidade (fase que tamén están xogando o Bergantiños, o Compostela e o Alondras). O cadro ferrolán tamén parte con marxe ao seu favor. Veremos se a vitoria pola mínima na casa (1-0) tamén a honra no estadio de La Victoria de Jaén (dom. 20 horas).
Con estes antecedentes o Foz viaxa a Monforte e o Lemos recibe ao Foz (domingo ás 17 horas). O conxunto local encara a competición con máis ilusión. E tamén coa planificación da temporada que vén. Na anterior rolda superou a domicilio ao Sanci. Castañer, Armesto e Varela marcaron cadanseu dobrete. Nos cuartos de final xa agarda o Pol. O Burela retirouse da competición, polo que o cadro polense xogará co Lemos ou co Foz.
QUE OPINAN OS PROTAGONISTAS?
JESÚS GAYOL (ADESTRADOR DO FOZ)
-A Copa: “Chegamos á Copa moi xustos. Animicamente nada ben, despois de non sumar un punto a pasada xornada en Noia. E depender agora de terceiros”.
-A eliminatoria co Lemos: “Pasa a un segundo plano totalmente. Imos porque hai que ir. Non porque haxa moitas esperanzas”.
-As eliminatorias do Celta B e do Racing de Ferrol: «O equipo está pendente, o club está pendente, todos estamos. Criamos que cos 48 puntos que fixemos serían suficientes. Pero a situación é a que é. Sería marabilloso poder confirmar a permanencia xa este domingo. Para a semana hai convocatoria de eleccións. O presidente en principio non vai continuar. Salvarse permitiría poder traballar con moita máis marxe. Contar xa con todo o mes de xuño para planificar a vindeira temporada. A diferenza deste ano que fomos máis xustos”.
EDU RODRÍGUEZ (ADESTRADOR DO LEMOS)
-A Copa: “Un pouco como falamos antes de empezala: coa ilusión de chegar o máis arriba posible. Sen obxectivo claro de gañala nin moito menos. Pero é unha competición ilusionante”.
-A eliminatoria co Foz: “É un equipo que coñecemos ben. E eles tamén nos coñecen. O ano pasado loitamos os dous por subir. Viñeron aquí a Pinguela xogarse o ascenso. É un equipo moi sólido a nivel defensivo; perigoso a través das transicións e a balón parado. Nós tentaremos facer o noso xogo».
-Planificando xa a próxima campaña do retorno á Preferente: “Agora mesmo renovamos catorce xogadores. A columna vertebral está renovada. A semana que vén empezaremos coas fichaxes. Creo que o luns xa poderemos anunciar algunha importante”.
ESTA FIN DE SEMANA TAMÉN PODES VER…
Oitavos de final da Copa 2019 da Preferente e 1ª Rexional
– Sarriana – Ribadeo (sábado ás 18 horas no Gandarón). Un encontro de Preferente que se vai xogar no Gandarón de Paradela. Un campo que este ano xa viviu un ascenso e que foi remodelado a finais do 2018. Duelo,a priori, igualado. Dous equipos que fixeron unha gran temporada na Preferente.
– Riotorto – Chantada Atlético (domingo ás 18 horas na Veiga). Os visitantes chegan en situación similar ao Foz. Da salvación do cadro focense depende agora a continuidade do Chantada Atlético na Primeira Rexional. Xogarán o seu partido de Copa ante o Riotorto pero terán un ollo no resto de encontros citados. A permanencia do conxunto chantadino suporía a salvación da SD Becerreá na Segunda Rexional.
Cuartos de final da Copa 2019 da 2ª e da 3ª Rexional
– Roupar – Meira (domingo ás 17:30h no Novo). Dous dos equipos máis en forma da zona norte buscan unha praza nas semifinais. O Roupar vén de eliminar nos penaltis ao Guitiriz e no tempo regulamentario ao Folgueiro. Foi terceiro na competición regular. O Meira finalizou na metade da táboa pero está dando a sopresa na Copa. Superou a todo un Lourenzá no seu campo. O pasado domingo eliminou con contundencia na Lomba ao Mondoñedo.
– San Lázaro – Palas (sábado ás 18:30 horas na Ponte). Dous dos equipos que estiveron a piques de logralo ascenso. Pelexárono ata a última xornada. Buscan resarcirse na Copa. O San Lázaro non perde dende a chegada de Diego Rey como adestrador. Vén de eliminar ao Guntín no Ladairo. Pola súa banda, o Palas tamén vén de asaltar Os Medos. Venceu a outro amigo da Copa, o Brollón.
Fase de ascenso á Primeira Galega
Friol B – Bergantiños (domingo ás 19:45 horas na Reigosa). O campo friolés vivirá primeiro a emoción da Copa entre o Friol e o Santaballés. Posteriormente a da fase de ascenso á Primeira Galega no fut fem. O filial do Friol B debe remontar o 2-0 encaixado nas Eiroas para continuar na fase. No caso de superala, aínda lle quedarían dúas roldas máis a dobre partido.
FÓRA DOS MARCOS DA PROVINCIA
Marchamos fóra porque un equipos lucense ten tamén unha cita importante no territorio galego. O Viveiro xoga contra o Barbadás (sábado ás 18:15h nos Carrís) a ida da eliminatoria de terceiros da Preferente. Se supera esta fase tería opcións de ascender no caso de que o Celta B permaneza na Segunda B e se tres dos equipos galegos da Terceira suben de categoría.
