O Matela conseguiu vencer na final do play off de ascenso do grupo norte da Terceira Futgal ao Abadín e xa son equipo de Segunda. Os de Cuchi conseguírono cunha gran autoridade, gañando por 5-2 no partido de volta da eliminatoria. Así acadaron o obxectivo que se planteaban durante esta tempada, onde contaban cun equipo novo, con xuventude e moita calidade. A iso hai que engadir un gran compromiso que fixo que o traballo saíse á perfección.

Demostración de poder do Matela

A final da promoción de ascenso foi unha clara demostración de poder dun Matela que tiña claro que este ía ser o ano no que alcanzasen a Segunda Futgal. Xa nas semifinais conseguiron vencer ao Rioaveso Machinango tras remontar fóra de casa no partido de volta por 1-3 nun encontro onde mostraron a súa superioridade ao chegar a poñerse con un 0-3 no minuto 62.

Pero a final foi outra historia. Xa na ida ante o Abadín, os de Cuchi conseguiron vencer pola mínima fóra da casa. Na volta consolidaron o resultado cunha exhibición de xogo na que o propio adestrador do Matela, Cuchi, admite que «puidemos meter máis goles». O resultado foi de 5-2, pero na primeira media hora do encontro xa mandaban por un 3-1 que deixaba a eliminatoria vista para sentencia.

Un grupo novo e comprometido

O Matela conformou un grupo completamente novo de cara a esta tempada pero cun gran nivel de xogo. «Tiñamos a moitos xogadores que están na universidade que nos permitiu facer un equipo novo moi forte e conseguimos acadar os nosos obxectivos«, afirma Cuchi, quen engade que «o compromiso foi máximo nos adestramentos e iso ao final da tempada nótase porque todas as ideas que queres introducir pódelas traballar«.