Chega o sexto Tres en Raia Boas Mans Fisioterapia desta temporada e faino con dous líderes sólidos, Mondoñedo e Corgo, que abren fenda con respecto aos seus perseguidores.

No grupo norte, o Mondoñedo segue con pleno de puntos logo de impoñerse ao Celeiro e conta con cinco puntos de marxe sobre o Muimenta, que xa é segundo tras golear ao Abadín. Terceiro é o Catro Roldas, que igualou no campo da Comercial. O Pol B entra en play off e o Rioaveso reencóntrase coa vitoria logo de cinco xornadas.

No grupo sur, o Corgo suma e segue. Seis de seis e un só gol encaixado. Os de Abel Rochela sácanlle catro puntos ao Rubián, que non pasou do empate diante do Relámpago Taboada. O Quiroga volveu gañar e iguala na terceira praza cun Taboada B que sumou a cuarta vitoria consecutiva.

GRUPO NORTE

O Mondoñedo vence ao Celeiro en Trasvías con máis dificultados do que reflexa o marcador (1-4). O Celeiro saiu ao campo cunha actitude diferente aos últimos encontros e non tardou en reflexarse no marcador cun gol de Cristóbal. O Mondoñedo entrou descontrolado ao partido e tardou en igualar ao rival. Chachi, á media hora de xogo, logrou o empate e á volta dos vestiarios Jacobo fixo o segundo ao transformar un penalti. Os locais lanzáronse a polo empate, pero Javi sentenciou nos últimos dez minutos con dous goles, o último deles cun bo testarazo ao pao longo.

O Muimenta supera con claridade ao Abadín no Pichón (7-1). O encontro comezou con pouco ritmo. O Abadín propuxo un fútbol directo que o mediocentro Iago desbaratou sen demasiados problemas. Jairo abriu o marcador nun lanzamento de penalti cometido por Chupi. Os axustes do Abadín no seu esquema non lle deron resultado e o Muimenta fíxose co control do partido. Os de Fran Veiga xeraron perigo con certa facilidade e contaron con moito acerto cara a portería contraria. Jesús e Seijas deixaron o partido encarrilado no primeiro tempo. No segundo tempo a reacción do Abadín rematou co cuarto tanto, obra de Seijas de falta. Non tardou o atacante en completar un póker de goles e Jesús completou a goleada co seu segundo tanto, os dous de cabeza. Bufy maquillou o resultado desde o punto de penalti.

O Catro Roldas empata no difícil feudo da Comercial (2-2). Os locais manteñen a súa condición de invictos no seu campo logo da visita dun Catro Roldas que se adiantou no marcador cun gol de David Orosa. No mellor momento de xogo dos visitantes a Comercial logrou o empate. Non tardou o Catro Roldas en volver a darlle a volta ao marcador por medio de Omar. No segundo tempo, os de Coto contaron con ocasións para marcar, pero nos últimos dez minutos o cadro local contou con varias opcións de gol e logrou o empate cun tanto de Dani nun lanzamento desde a frontal.

O Rioaveso reencóntrase coa vitoria diante dun Roupar que non a coñece (2-0). Non gañaban os locais desde a primeira xornada de liga e fixérono fronte ao Roupar. Os xermadinos melloraron a imaxe ofrecida nos últimos encontros, pero seguen sen lograr o triunfo na presente temporada. Os de Asier Lozano foron mellores no primeiro tempo, malia que a boa labor de Anxo Rey na zaga visitante impediu que o marcador fora máis amplo e ao descanso só Álex Anido foi quen de marcar. No segundo tempo o Roupar saiu decidido a igualar o choque, pero a boa actuación do gardameta Antón impediuno. Nunha contra ben levada polo Rioaveso chegou o segundo tanto, obra de Amido. Xose e Tupac contaron con ocasións no tramo final para recuartar diferencias.

O Pol B vence ao Cazás e sitúase en zona de play off (3-1). Os locais tiveron a posesión do balón fronte a un Cazás que xogou replegado e buscando xerar perigo sobre todo a balón parado. Os de Luis Romay xogaron algo acelerados sen atinar co ritmo correcto de xogo, pero foron quen de adiantarse gracias a un gol de Juan David. Tras o descanso o Cazás saiu a buscar o gol e dominou ao Pol B durante uns minutos. Nunha contra chegou o segundo gol de Antón que deixou o choque en clara vantaxe para os locais. Non se rendiu o Cazás, pero non estivo atinado. Nun erro defensivo visitante, David Balado sentenciou e Bruno marcou o tanto da honra para os xermadinos.

GRUPO SUR

O Corgo logra unha traballada vitoria diante da Piringalla para seguir invicto (0-1). Un só gol en contra. Un dato que da boa mostra da seriedade defensiva dun Corgo que camiña con paso firme no liderado. Os de Abel Rochela derrotaron pola mínima á Piringalla, en boa medida grazas á boa actuación do gardameta Reija, que salvou tres claras ocasións de Ethan nun primeiro tempo no que Xoia estrelou un balón na cruceta. Este non errou ao pouco de comezar o segundo tempo, tras recoller un balón na banda e definir ao primeiro pao. O visitante Raúl viu o segundo cartón amarelo con máis de media hora por diante e a Piringalla tratou de igualar o encontro e Jony tivo que sacar un balón baixo paos cando xa se cantaba o gol local.

Relámpago Taboada e Rubián igualan sen goles (0-0). O cadro local consolida a súa praza no play off malia a ser o segundo conxunto menos goleador do grupo. A boa labor defensiva dos de Melendo fixo que o segundo clasificado non fora quen de gañar na Medela. O Rubián levou a iniciativa pero custoulle superar a zaga local e cando o fixo apareceu a figura de Adri na portería que desbaratou as ocasións dos de Senén López.

O Taboada B suma a cuarta vitoria consecutiva no campo do Carballedo (1-4). Xeiras contrapostas no Catro Ventos. Os locais cun só punto quedan na derradeira posición da táboa, mentres que os visitantes son terceiros e sumaron os doce últimos puntos en xogo. O encontro comezou cun Carballedo ben situado que puxo en serios apretos a un filial que logrou adiantarse nun penalti protestado polos locais que transformou Pita. Nun córner igualaron os de David Guerra e co campo danado polas condicións climáticas ambos conxuntos optaron por un fútbol máis directo. No segundo tempo o Taboada B saiu moi ben ao campo e Pita completou outro hat-trick. Primeiro cun lanzamento de falta e logo tras un erro defensivo. Anxo fixo o cuarto no tramo final.

O Quiroga vence ao Incio con dous goles no tramo final (2-0). Nun encontro moi condicionado polo mal estado do terreo de xogo, o Quiroga volveu vencer logo de colleitar dúas derrotas consecutivas. Ámbolos conxuntos optaron por un fútbol moi directo no que o Incio atopouse máis cómodo. As ocasións escasearon e só Ariel estivo preto de marcar para os locais. No segundo tempo o Quiroga mellorou e contou con ocasións para marcar nas botas de Brian, Chechu e Pablo. Nun Municipal convertido xa nun barrizal e con poucos minutos por diante Manuas adiantou aos locais e Lubi, acto seguido, sentenciou.

Bóveda e Río Sil empatan nun choque que non deixa contento a ningún (0-0). Encontro moi parello non serve para que algún dos dous conxuntos rachen coa mala xeira de resultados. Un terreo de xogo enlamado evitou que se poidera xogar o balón e predominaron os balóns en longo e escasearon as ocasións. Os centrais de ámbolos equipos estiveron imperiais e evitaron situacións de perigo. Só no tramo final puideron chegar os goles. O Bóveda estrelou un balón na cruceta no que foi a ocasión máis clara.