O Riotorto cae diante dunha Milagrosa que se agarra á permanencia (0-2) Partido con moito fútbol directo na Veiga que se resolveu na recta final do primeiro tempo. Un gol en propia meta dos locais á saída dun córner e un mal rexeite da zaga do Riotorto foron aproveitados pola Milagrosa para chegar cunha vantaxe de 0-2 ao descanso. Aínda que na segunda metade o cadro local tivo o dominio do coiro e as ocasións máis claras, o oficio dun cadro visitante comandado por Joel —un dos Máxicos da semana— mantivo a súa portería a cero e levou tres puntos importantísimos cara o Gorgoso.

Táboas en Cerdeiriños para tranquilidade de todos (1-1). O Lourenzá agardou moi repregrado aos seus rivais no primeiro tempo e anulou as ofensivas locais, mentres que o Monterroso procuraba incidir con moito fútbol directo. Tras o paso por vestiarios, os visitantes adiantaron liñas e Yago Cruña anotou o 0-1, pero unha boa reacción local traduciuse no empate de Guaje e en varias ocasións para remontar a contenda, pero finalmente o marcador mantívose no 1-1 e os puntos se repartiron nun choque no que ambos conxuntos fixeron méritos para vencer.

Un descoñecido Outeiro cae con claridade en Santaballa (6-1). O cadro dirixido por Adrián Vázquez estivo moi lonxe da súa mellor versión e cometeu tres erros clamorosos -dous na primeira metade e outro no comezo da segunda- que non desaproveitaron os Máxicos do Santaballés para anotar tres tantos. Xa co 3-0, chegaría o cuarto dos locais e, cando o Outeiro conseguiu o gol da honra de penalti, os de Freire fixeron dous goles máis para engrosar o resultado dun choque cun só dono, 6-1.

O Guitiriz vence ao Guntín para soñar (1-0). Os visitantes levaron o peso da posesión na primeira metade, pero a falta de ideas en último terzo de campo e a solidez local provocaron que o resultado ao descanso fose de 0-0. No segundo tempo, un remate do Guitiriz á saída dun saque de esquina puxo por diante aos de Marquitos (1-0) e, acto seguido, o Guntín errou unha pena máxima que tería suposto a igualada. Xa co duelo máis calmado, os Máxicos locais tiraron de oficio e mantiveron a renda para sacar tres puntos que manteñen vivo ao Guitiriz.

O Atlético Escairón iguala co Chantada Atlético nun polémico duelo (1-1). Unha acción caótica no primeiro minuto de xogo converteuse no gol local, que os do Saviñao procuraron defender ao longo de todo o choque. Especialmente tras a expulsión de Asier cun polémico segundo cartón amarelo e tras a expulsión do adestrador local e conseguinte suspensión momentánea do choque no 30′, ata que chegou a Guardia Civil e se reanudou o xogo.

O gardamallas Macía tamén foi expulsado xusto no comezo do segundo tempo e, con 11 xogadores contra 9, o Chantada Atlético pechou ao Escairón na área local e acadou o empate nun penalti transformado por X. Continuou o asedio visitante, pero uns Máxicos locais moi resistentes mantiveron o resultado e sacaron un punto moi meritorio.

O Taboada supera con comodidade ao Portomarín (4-1). O choque mantívose moi igualado ata o 1-0 local que, sumado ás lesións dos visitantes Hugo e Pisos, desconcertou a un cadro miñoto que regalou dous goles máis antes do descanso, 3-0. O Taboada buscou controlar o partido na reanudación, pero o Portomarín tirou de coraxe e logrou recurtar diferenzas para soñar co empate. Porén, o cuarto gol dos de Martín Murado sentenciou o choque na Medela, 4-1 para os Máxicos branquiazuis.

O Meira vence ao Burela e pon o título en bandexa do Pol (2-1). Os Máxicos do Meira asinaron un dos mellores choques do ano e, logo dunha primeira parte dominada polos de Labrada, o resultado ao descanso era de 1-0. O Burela adiantou liñas tras o paso por vestiarios, pero Panchi fixo o 2-0 para desatar a tolemia na Lomba. Porén, o Burela non se rendiu, recurtou diferenzas e tivo unha pena máxima para empatar, pero Jairo errou o disparo. O Meira puido sentenciar na recta final, pero un Kiko Mariño moi en forma evitou o terceiro tanto local.

MÁXICOS SALVATIERRA ABOGADOS