Na nova semana, os Máxicos Salvatierra Abogados competiron coa máxima intensidade para sacar un resultado bo para o seu equipo.

O Chantada Atlético saca un punto do Martínez Otero (1-1). Os locais dominaron o xogo posicional, mentres que os do Sangoñedo inquedaban a meta mariñá con balóns parados e transicións rápidas. Na primeira metade, un saque de esquina supuxo o 0-1 a prol dos chantadinos e, pouco despois, Jorge anotou o empate co que se chegou ao tempo de lecer.

Xa no segundo tempo, o Foz foi máis protagonista e gozou de oportunidades, pero Anxo Sampayo estivo moi atinado baixo paus para manter o empate ata o asubío final dun choque no que ambos cadros remataron amolados coa actuación arbitral (os visitantes no primeiro tempo, os focenses tras a reanudación).

O duelo entre Xove Lago e Monterroso suspendeuse por unha indisposición de varios xogadores visitantes. Os locais, pola súa banda, están sin adestrador logo da destitución de Santi Silvar.

O Castro e o Santaballés asinan táboas no Arturo Pereiro (1-1). Os locais levaron a voz cantante no Municipal, pero o Santaballés estivo moi serio no plano defensivo. Os erros na definición condenaron ao Castro, que encaixou o 0-1 nun saque de esquina, pero os vermellos empataron cedo cun lanzamento desde os once metros. Na segunda metade, aínda que o Santaballés cedeu o coiro ao Castro, houbo alternativas para ambos, pero ningún dos dous conxuntos —especialmente o de Dumi— estivo atinado na definición.

A SD Chantada asusta tras vencer ao Oural (8-0). Xa no primeiro minuto de xogo se adiantaron os de Traste logo dun erro dos sarriáns e, desde ese momento, o dominio chantadino foi absoluto. Os goles acumuláronse, especialmente, na segunda metade. Aínda que os do Luis Pallín trataron de dar o máximo e non perder a cara do partido, o bo momento de forma que atravesa a SD Chantada quedou demostrado sobre o céspede do Sangoñedo.

O Córgomo é máis efectivo que o Brollón (0-4). Non fai xustiza o electrónico ao visto sobre o céspede dos Medos. Aínda que os ourensáns se adiantaron cun gol de Abiodun mediado o primeiro tempo, o Brollón competiu de ti a ti e gozou de ocasións para igualar o marcador. Porén, a calidade individual visitante e os erros dos locais condenaron aos da Pobra, que seguen traballando para atopar o pulso da categoría.

O Outeiro saca o primeito triunfo do curso a costa do Lourenzá (2-1). Era un duelo de urxencias no Municipal e saiu cara para os chairegos. As dúbidas, os erros e a igualdade foron protagonistas no primeiro tempo. Unha boa xogada individual de Diego traduciuse no 1-0, pero un balón parado a prol dos visitantes supuxo o 1-1 mediado o primeiro tempo. Xa na segunda metade, os locais fixeron valer a súa condición —pese aos nervios— e un saque de esquina rematado por Mateo foi o 2-1 que, finalmente, se tornou definitivo.

A Residencia supera na Cheda ao Racing Villalbés ‘B’ (2-1). Foi un partido pechado no feudo branquiazul. Logo do primeiro tanto de Artai, os chairegos erraron unha pena máxima e a Residencia aproveitou para duplicar a renda antes do descanso (2-0). Os de Iván Lamas deron un paso adiante antes do descanso, recurtaron diferenzas nunha falta directa e apretaron ata o final na procura dun punto, pero a solvencia defensiva dos locais deixou os puntos na Cheda para manter aos de Rafa Casanova colíderes.

O Ribadeo vence no «Canti» (0-2). Non estivo cómodo o equipo mariñán ante un Taboada que inquedou moito a meta celeste. Porén, un contragolpe na recta final do primeiro tempo saldouse co 0-1, e o alto ritmo que impuxeron os do Pepe Barrera na reanudación valeulles para anotar o 0-2. Os de Martín Murado non baixaron os brazos e loitaron ata o final cun xogo moi vertical, pero logo de errar unha pena máxima non tiveron opcións de puntuar no seu feudo.

O Guntín asalta O Saviñao (1-2). Os laranxas querían ser protagonistas con balón, pero a boa presión local ao longo de toda a primeira metade impedía os avances visitantes. Xa na reanudación, Denís anotou o 1-0 para os seus logo dunha boa xogada por banda dereita. Foi entón cando o Guntín se amosou máis vertical e Pablo fixo o empate logo dun gran pase de Samu e, pouco despois, unha triangulación dos de Germán Campos na dereita saldouse cun disparo de Pablo que supuxo o 1-2. Desde aí, a solvencia defensiva do Guntín valeulle para sacar tres puntos de ouro do Municipal.

O Iberia cae nas Valgas ante unha intensa Milagrosa (1-2). O alto ritmo da Milagrosa e a súa efectividade de cara ao gol marcou a diferenza en San Miguel. Tres chegadas visitantes con ataques verticais traducíronse en dous goles para os de Madriles, mentres que os de Moro tiñan a posesión pero apenas inquedaban a meta albivermella. Na segunda metade, o Iberia buscou recurtar diferenzas e gozou de varias opcións, pero non foi ata o engadido cando acadou un 1-2 que se tornaría anecdótico nun duelo no que ambos conxuntos remataron amolados coa actuación arbitral.