• Tras varias derrotas consecutivas, a Milagrosa acadou unha valiosa vitoria ante un rival directo pola promoción
• O San Lázaro tampouco fallou ante o colista
• O derbi comarcal entre Carballedo e Chantada levárono as visitantes
• O PM Friol B derrota ao San Roque e avanza na Copa

Tras encadear varios resultados complexos, as de Héctor expósito firmaron un gran partido, levando a teoría á práctica co mellor dos desempeños e vencer así a todo un Victoria CF C, rival que tamén está metido de cheo na loita polo ascenso.

Cando Irene está de doce, a Milagrosa sorrí. Cos seus tres goles e ben acompañada non só polo tanto de Candela, senón por un gran esforzo coral, as milagrosistas superaron con claridade (4-0) ao Victoria CF C, ao que agora sacan catro puntos na táboa da Segunda Futgal.

Resultado axustado para as de Rubén Candal que, porén, foron moi superiores ao Órdenes, que chegaba a terras lucenses como colista.

Malia dominar todos os eidos do xogo, ao San Lázaro faltáballe atopar o gol e, sen iso, non hai sensacións nin estatísticas válidas. O balón estrellouse unha e outra vez co pau, impedindo ao San Lázaro recoller os froitos do seu esforzo e do seu bo xogo.

Porén, tras o paso polos vestiarios e con pouco merecemento, foi o Órdenes quen se puxo por diante cun gol de Anabel no 57. De seguido Xiana atopou por fin diana para empatar o encontro (1-1) pero de novo repetíronse as dificultades para as celestes de cara ao gol.

Xa a piques de escoitar o asubío final, Xiana volveu a anotar para dar uns merecidos 3 puntos ao San Lázaro, cuxa vitoria puido ter unha renta de goles moito maior ao 2-1 que o luminoso reflectiu ao final.

Partido único na Terceira Futgal, pero deses que se agardan toda a tempada. O Catro Ventos acolleu o domingo todo un derbi Carballedo-Chantada que, aínda que sempre conleva moitos nervios por parte de ambos equipos, tamén ambos coinciden en valoralo como un encontro «entre amigas», aínda que a competitividade (sa) non falte.

Dende o inicio, o Chantada amosou o porqué da súa condición de líder, dominando o partido e facendo correr detrás do balón a un Carballedo que, malia estar no seu feudo, amosou un nerviosismo moito maior que as chantadesas.

Saray abriu o marcador para o Chantada no minuto 15 e Iria acompañouna no 35. O luminoso non se movería xa ata a volta do paso polos vestiarios, tras o cal o Carballedo saiu máis relaxado e mellorou o seu xogo, o que tamén trouxo a recompensa co gol (1-2) de Sara no 59.

Porén, o Chantada tiña máis calidade e fíxoa valer. Seguiu dominando o encontro ata que Uxía certificou a vitoria co 1-3 no 90′.

Os cuartos da XLII Copa Deputación de Lugo abríronos o San Roque e PM Friol B nun enfrentamento no que as friolesas saíron vitoriosas e xa agardan rival na semifinal.

Na Copa Deputación 2026 estreamos unha nova sección: O Ás de Copas. Nela repasamos os encontros do torneo copeiro e baixo o seu paraugas nomearemos unha xogadora destacada de cada eliminatoria.

Un ás é unha persoa que sobresae nunha actividade especialmente deportiva. As copas xóganse e tamén se desfrutan. Por iso, a Ás de Copas contará todo o que dea de si o torneo promovido pola entidade provincial.

O San Roque, consciente da dificultade do partido, tentou saír ao campo mentalizado de que se querían pasar o esforzo había ser máximo, mais o dominio do PM Friol B foi claro e axiña Ana (no m. 2) puxo por diante ás amarelas.

Porén, o San Roque non baixou os brazos e aproveitou a incapacidade das friolesas de converter as súas innumerábeis ocasións en gol para empatar o partido grazas a un gol de Paula nun libre indirecto.

Aínda que o marcador marcharía ao descanso co empate (1-1), o visto sobre o verde era distinto, cun PM Friol B superior pero negado de cara á porta.

Houbo que agardar ata o 77 para que Patri conseguira por fin anotar e dar a vitoria e pase a semifinais ao conxunto de Ángel Villar.

O Ás de Copas (cuartos de final):