Poucos encontros servirán de tantos reencontros como este derbi entre dous conxuntos que non ven as caras en partido oficial desde fai quince anos. Iberia e Ribadeo enfrontaranse o domingo ás 16 horas nas Valgas, onde se agarda un gran ambiente e onde os locais celebrarán o seu noventa aniversario. Impartirá xustiza o colexiado focense Ángel Ron.

Ata dezanove dos vintecinco xogadores con ficha actualmente no Iberia pasaron pola estructura do Ribadeo, ben sexa polo primeiro equipo, ou pola base da SD Ribadeo. Ademáis o adestrador, Miguel Fuente ‘Moro‘ tamén pasou por varios equipos da SD e acadou o ascenso á liga galega co cadro xuvenil. Polo tanto, non cabe dúbida que é o encontro marcado en vermello no almanaque das Valgas.

Os de San Miguel chegan a este encontro na décimocuarta praza con once puntos, dous por enriba da zona de descenso directo. Malia que só Taboada e Santaballés empeoran os números do Iberia como local, os de Moro acadaron nas últimas xornadas unha mellora palpable con respecto ao comezo ligueiro. Nos últimos cinco encontros caeron en dous, precisamente diante dos conxuntos que lideran a clasificación: Residencia e Chantada. E en ámbolos dous estiveron moi preto de sumar. Foron quen de gañar ao Xove Lago e igualaron ante Outeiro de Rei e Taboada, este último a domicilio.

Pola súa banda, o Ribadeo é terceiro na clasificación con vintecatro puntos e ocupa praza de play off de ascenso, aínda que mira desde certa distancia ao Chantada e á Residencia aos que ten a oito e nove puntos, respectivamente. Os de Diego Bermúdez veñen de vencer nos dous últimos encontros e son, co permiso dos dous de cabeza, o mellor conxunto da categoría a domicilio. Os ribadenses son o segundo equipos máis realizador do grupo lucense da Primeira Futgal con trinta e un goles anotados, dezanove deles levan a sinatura de Anxo (7), Castrín (6) e Álex Meitín (6).

O último enfrontamento en liga entre Iberia e Ribadeo nas Valgas data do 14 de novembro de 2010. Daquela o Ribadeo vencera por 1-3 nunha temporada que remataría co ascenso dos ribadenses e co descenso do Iberia.

Os protagonistas do encontro son dous xogadores con orixe na parroquia ribadense de Cubelas. Javier Fernández Díaz ‘Cube‘, xogador do Iberia e supervivinte, xunto con Marcos Pernas, do último enfrontamento nas Valgas, aínda que ambos nas filas do Ribadeo, e Adrián García Torviso ‘Adrián Cube‘, futbolista do Ribadeo ao que chegou procedente do Iberia, onde militou as catro últimas campañas.

QUE OPINAN OS PROTAGONISTAS?

Cube (Iberia CF)

O Iberia. «Estamos nun bo momento. Collemos o pulso da categoría e comeza a verse o traballo que levamos facendo desde agosto. Xa desde o comezo de temporada fomos quen de competirlle a todos os equipos, pero pagamos a peaxe da nova categoría, que non é outro que pagar por cada erro que cometes. Agora estamos minimizando eses erros e comezan a verse os resultados«.

As opcións fronte ao Ribadeo. «Teñen unha calidade individual doutra categoría. Debemos evitar cometer calquer tipo de erro e ser moi intensos. Ir a cada disputa coa idea de gañala e sobre todo estar moi concentrados. Teñen xogadores moi bos que en calquera despiste poden castigarte«.

O reencontro. «Vai ser un partido moi especial. Xoguei no Ribadeo dezaseis anos e volver a xogar con ex compañeiros como Santi, co que compartín vestiario doce temporadas, Castrín, Roi, Xairo, Adrián Cube…sempre mola. Será o único día que quero que perda o Ribadeo. Ogallá sexa un gran partido e que non se lesione ninguén«.

Adrián Cube (Ribadeo FC)

O retorno ás Valgas. «Afróntoo con tranquilidade. Sempre é especial xogar contra o equipo do que formache parte, pero ao final é un partido máis no que están en xogo tres puntos importantes«.

O Iberia. «Creo que van plantexar un partido duro no que non nos van regalar nada. Debemos estar moi unidos e xogar como un equipo, por aí pasarán as nosas opcións de sacar os tres puntos nun campo difícil«.

As posibilidades de ascenso. «Creo que están intactas. Queda moita liga por diante e tanto Chantada como Residencia perderán partidos. Debemos facernos fortes e estar preto deles para aproveitar as oportunidades que se presenten».

Un fixo no once. «Atópome moi agusto no sistema do adestrador. Pero creo que teño que seguir esforzándome en cada adestramento e en cada partido para mellorar».

A AXENDA DO FINDE NA XEOGRAFÍA LUCENSE

Segunda Galega Feminina

San Lázaro – Corme (Domingo ás 16 horas no Rodríguez Lago 1): as de Rubén Candal queren achegarse aos postos de play off. Reciben a un conxunto que vén de sumar os últimos dezaoito puntos en xogo.

Primeira Futgal

Castro – Chantada (Domingo ás 16 horas no Arturo Pereiro): os de Dumi precisan con urxencia un triunfo para non descolgarsse da pelexa polo ascenso. Enfronte estará o líder, un ata o de agora intratable Chantada.

Segunda Futgal

Pastoricense – Riotorto (Domingo ás 16:15 no Acebreiro): os locais queren engancharse á pelexa polos postos de privilexio nun interesante derbi no que reciben a un Riotorto que sumou os últimos quince puntos en xogo.

Becerreá – Santa Comba (Sábado ás 18:15 horas no Municipal): logo do triunfo no Polvorín diante do San Roque, o Becerreá recuperou o liderado. Igualado cos da Montaña está un Santa Comba en racha. Partidazo co liderado en xogo.

Terceira Futgal

Catro Roldas – Rioaveso (Domingo ás 16:30 horas na Canteira): logo de dúas xornadas sen gañar os locais buscarán os tres puntos nun derbi vilalbés no que o Rioaveso tentará sumar para achegarse ás prazas de ascenso.

Corgo – Relámpago Taboada (Domingo ás 17 horas no Municipal): os de Melendo, cadro difícil de superar nesta temporada, buscará poñerlle as cousas difíciles ao líder. Os locais sumaron todos os puntos en xogo.

Foto de portada: Facebook Veteranos Futgal Grupo Lugo Provincial.