O 31 de xullo é o día límite para comunicarlle á Federación novas altas ou baixas de clubs na Terceira Futgal. Se se manteñen os que están, habería 21 equipos, que se repartirían en 10 para a zona norte e 11 para a sur.

A Futgal abre a porta a xuntar aos equipos da 2ª e da 3ª na mesma categoría

Ademais, como comentabamos no titular saíu a debate a posibilidade de xuntar os equipos da 2ª e da 3ª nunha mesma categoría. A día de hoxe serían 53 equipos. Xa non é un tema novo, pero desta volta percibiuse máis vontade por parte do ente organizador de presentar unha proposta para a temporada que vén.

O secretario xeral, Diego Batalla, apuntou que non había moita marxe de tempo, ao considerar que debería existir unha proposta que se debatira xa na vindeira Asemblea do 29 de xullo. Non obstante, comprometeuse a estudar o asunto.

No caso de que esta opción fose adiante, non habería ascensos na seguinte temporada en Terceira. Os responsables federativos acordaron deixar aberta a circular con dúas propostas: unha co formato das últimas tempadas (dous ascensos directos e un en play off) e outra sen ascensos, porque xa pasarían todos á Segunda, e coa única loita de ser campión.

A delegación de Lugo tamén quedou de manter unha xuntanza cos clubs adscritos a estas divisións para ratificar nunha votación a posible proposta.

Á xuntanza acudiron ao redor duns 70 representantes dos clubs da provincia. Varios deles reafirmaron novamente as súas queixas ante a perda de representitividade dos equipos de Lugo nas principais categorías do fútbol afeccionado.

A situación dos clubs femininos da provincia e do resto de Galicia será tratada nunha xuntanza en Santiago.