O fútbol lucense está de noraboa esta semana debido a que a competición volta para os equipos nas categorías máis altas do fútbol máis modesto. Neste curso, a provincia voltará a ter representación na Segunda RFEF grazas ao recente ascenso da Sarriana, mentres que na Terceira RFEF serán tres os equipos lucenses en competir. Rácing Villalbés, Viveiro e Lugo B tratarán de manter á provincia no máis alto do fútbol galego.

A Sarriana cumpre un soño

Ninguén en Sarria chegaría a imaxinar á hora de ascender á Terceira que sería o segundo equipo en categoría de todo o fútbol lucense. Despois do ascenso acadado no play off da tempada pasada, iso pasou a ser unha realidade. Agora toca un curso novo con grandes cambios onde o principal serán as grandes viaxes cara a Castela, Asturias ou Cantabria e a ilusión de visitar campos emblemáticos do fútbol nacional como Los Pajaritos ou o Helmántico.

O obxectivo está claro, chegar aos 45 puntos que marcan a permanencia historicamente na categoría. Todo con Iván Carril no banco despois da marcha de José Antonio Rodríguez para acompañar a Fran Justo no Mirandés. O de Rebordaos chega despois de construir a un Noia que foi o equipo revelación da Terceira RFEF na pasada campaña, chegando a disputar a promoción de ascenso. A tarefa non será doada, pero o apoio da afección é incuestionable.

No seu cadro de xogadores, a Sarriana continúa con grandes estandartes do seu equipo como Maxi Levrand, Boedo, Arona, Millán, Piay ou Jacobo Vilariño entre outros. Tamén se dan os regresos á provincia de Iago Díaz e do sarrián Iago Parga. Ademais, firmaron novos xogadores onde predomina a xuventude con talentos como David Vilán, Hugo Villaverde ou William e tamén xogadores que coñecen a provincia como Antón Núñez, Fernando Embadje, Ju ou Freire.

O fútbol lucense segue forte en Terceira

Na Terceira RFEF, a situación segue sendo moi forte cos tres equipos do fútbol lucense mostrando todo o seu gran peso e experiencia na categoría. Os tres foron capaces de conseguir os seus obxectivos de maneira tranquila ao longo do curso, co Rácing Villalbés entrando no play off, o Lugo B acadando unha sólida tempada na zona media e o Viveiro sumando unha nova permanencia.

O conxunto chairego vivirá unha tempada de moitos cambios despois dun curso positivo con Alberto López no que estiveron a piques de superar á Sarriana na primeira rolda da promoción. No banco estará Juan Rodríguez a cargo do equipo despois dunha longa traxectoria na que ten un gran control da canteira tras un moi bo traballo.

A baixa de Cañi é un golpe duro, pero o conxunto chairego conseguiu manter a pezas de gran valor dentro da infraestrutura do clube. Xogadores como Álex Santomé, Da Lama, Buyo, Make, Javi Rey ou Javi Varela. Tamén salvan a xogadores que saltaron ao once titular na pasada campaña como Cadra, Borja Miguez ou Anthony. En canto aos reforzos, os máis destacados son Pablo Trigo ou Álvaro Herrero.

O Lugo B vive unha nova situación ao ser, oficialmente, un equipo filial, o mellor clasificado do fútbol lucense, e non denominarse como Polvorín. Os albivermellos conseguiron unha gran tempada pasada na que foron un dos conxuntos máis sólidos na zona media. A mala noticia chega coas baixas, xa que nomes como Maceira, Ju, Antón, Lansade ou Freire no continúan dentro do clube.

O filial mellor clasificado do fútbol lucense renova por completo o seu cadro de xogadores con Dani Galán como o seu novo técnico. Só tres xogadores continúan desde a pasada campaña: Candal, Noah e Hugo Díaz. Pola contra, o grupo renovase por completo, aínda que hai nomes coñecidos como a volta de Hugo García. O nome máis prometedor vén do xuvenil, Arao Camala, que xa fixo a pretempada co primeiro equipo.

Na Mariña, o Viveiro está preparado unha campaña máis para o gran obxecito de acadar a permanencia. O ano pasado, Adrián Benavides cambioulle a cara ao equipo na última parte do curso para conseguir que este ano haxa tres equipos representando ao fútbol lucense na Terceira RFEF. O novo ano xa tivo un cambio de adestrador, Luchi estaba chamado a ser o encargado de levar o proxecto, pero non puido manterse no posto por motivos persoais.

Iso fixo que o Viveiro optase por contratar a Alberto López para comandar un novo ano futbolistico en Cantarrana, agora coñecido como Kiko Rey. No canto das súas renovacións, manteñen a Ayoub, Arturo Calvo, Esquerdeiro, Rolle ou Diogo entre outros. No mercado optaron por reforzarse con nomes interesantes como Yanike, Yago Cruña, Lansade, Germán Pared, Valen Mosqueira ou Franco Bellomo.