Rematou a primeira volta na Segunda Futgal. O Riotorto mantense como líder no norte, a pesar de perder co Meira, no que foi protagonista Farra. O Becerreá segue primeiro no sur, aínda que igualou na súa visita a Sober.

A falta de quince partidos para o final, as clasificacións están moi igualadas en determinadas posicións. A loita pola salvación promete varios equipos implicados.

A fin dos arrastres masivos é para a Preferente e a Primeira Futgal. Anteriormente nestas divisións, un descenso directo xa supoñía un arrastre. Agora non. As categorías enténdense como un todo e unha vez que a temporada está rematada, vanse distribuíndo os equipos polos distintos grupos.

É necesario lembrar que nestas categoría os arrastres siguen presentes. Un descenso dun equipo lucense na Primeira, provoca un descenso en cadea na Segunda, ben sexa para o norte ou para o sur. Agora mesmo, os tres descensos directos de Primeira provocan ese arrastre. Tal e como está a situación, aproximámonos a como quedaría a competición, tendo en conta que isto cambiará cada xornada.

Segunda derrota do curso do Riotorto 

O club riotorense perdeu no duelo de proximidade co Meira (2-3). É a primeira derrota da campaña na casa e a segunda da temporada. Só o Guitiriz fora capaz de sacar un punto da Veiga. Con todo, mantense coma líder. Agora con catro puntos de marxe sobre o Folgueiro e o Guitiriz e cinco con respecto ao Goiriz. 

O Meira escala un posto co triunfo e sitúase na 7ª posición. Acumula 25 puntos e gaña o dereito a loitar polos postos altos na segunda volta. Con varios equipos na pelexa, pero está a catro puntos da praza de promoción de ascenso. 

O Meira saíu ben plantado, aínda que a posesión do balón foi do Riotorto. Tras un par de avisos ao contragolpe, marcou o veterán Jorge Gómez ao aproveitar un rexeie tras un balón parado.  

No segundo tempo, os locais igualaron por medio de Carlitos. Con todo, o Meira foi capaz de volver poñerse por diante cun gran gol de falta directa de Farra. O cadro riotortense protestou esa acción que desencadeou no balón parado e con anterioridade recriminara unha pena máxima.

Avanzado o encontro, Kevin deulle máis vantaxe aos seus co terceiro, novamente con polémica. Nos instantes finais Osky recurtou diferenzas. O dianteiro anotou o seu décimo cuarto gol en liga. Ao final, o propio Kevin foi expulsado no Meira e sancionado cun partido. 

O Folgueiro volve á promoción

Os pupilos adestrados por Manuel Vicente aproveitaron as derrotas de Riotorto e Goiriz para gañar puntos. Volven á segunda posición tras superar ao Sanci (5-0). Acumulan 29 puntos, a catro do liderado e están igualados co Guitiriz. Quedan agora cun punto máis que o Goiriz e dous por riba do Cabreiros. 

O Sanci remata a primeira volta en descenso directo con sete puntos. Agora mesmo a salvación estaría na 13ª praza, precisamente a sete puntos. Precisa mellorar moito o ritmo de puntuación con respecto á primeira volta para pelexar pola salvación. 

Os locais partiron con vantaxe porque marcaron moi rápido por medio de Aarón. Con todo, os visitantes realizaron boas combinacións e equilibraron o choque en xogo. Superada a media hora, a expulsión de Jairo condicionou o resto do partido. Un tanto de Oki e outro de Aarón deixaron o partido visto para a sentencia no segundo tempo. 

Xavi e Pagua encargáronse de sentenciar o resultado nun segundo tempo con pouca historia. 

O Guitiriz, o mellor da Segunda nun domingo da desgraciada lesión de Manel

Sexto triunfo seguido do Guitiriz. Superou ao Goiriz (4-0) nun dos partidos da xornada pola posición de ambos equipos. 

Nun primeiro tramo de partido, o Goiriz foi superior. Amosou as súas potencialidades e chegou con máis perigo a área rival. Cara o final do primeiro tempo, os locais comezaron a ter máis dominio de balón e xeraron algunha ocasión. Gozaron dun penalti, que lanzaron alto.

No segundo acto, o Guitiriz púxose por diante ao pouco por medio de Adri Santamariña. Máis tarde, marcou Labrada e Asier. O propio Asier redondeou a conta asinando un dobrete ao final do encontro. 

Ademais da boa xeira, o Guitiriz tamén contou co regreso de Sergio Campello. O xogador da casa non iniciara a temporada, pero xa volver formar ao 100 % do equipo adestrado por Jose Manuel Lorenzo. 

A mala nova do encontro produciuse superada a media hora de xogo. Nunha acción en solitario, o veterán Manel lesionouse de gravidade. A gran icona do Goiriz acumulaba 14 titularidades este curso aos seus 52 anos. Dende aquí mandámoslle moito ánimo para el. 

O Cabreiros alcanza os 27 puntos 

O conxunto adestrado por Saúl Méndez finalizou a primeira volta na quinta posición, a dous puntos do posto de promoción de ascenso. Sumou a novena vitoria ante o Matela (5-0) e, sen empatar ningún encontro no que vai de liga, mantense nos postos cabeceiros. 

O Matela acabou a primeira parte da temporada na última posición con tan só seis puntos. Agora mesmo estaría a oito puntos da salvación. Precisa redobrar esforzos na segunda metade do campionato. 

A pesar do resultado abultado, os locais non clarificaron o partido ata que avanzou o segundo tempo. Nos primeiro 45 minutos apenas houbo ocasións e se hai que dicir un equipo mellor plantado no campo foi o Matela. 

Con todo, o Cabreiros camiou a súa imaxe na segunda metade. Adiantouse por medio dun balón parado. Tardou en sentenciar pero fíxoo grazas aos goles de Alberte, Jordano e un dobrete de Chema. 

O club da Acea aproveita o inverno para reforzarse. Anunciou a incorporación de 

O Alfoz volve marcar os mesmos que recibe

O cadro alfocense igualou na casa co Castroverde (3-3). Quinto empate do curso que o sitúa na sexta posición, a tres desa promoción de ascenso. 

Pola súa parte, o Castroverde sumou o seu terceira empate consecutivo na liga. Acumula catro xornadas seguidas sen perder, pero é antepenúltimo con nove puntos. Conta con dous puntos de marxe co descenso directo, pero agora mesmo a súa posición sería de arrastre. Estaría a cinco da salvación. 

O Castroverde colleu por sorpresa aos locais e púxose por diante con dous goles de vantaxe, da autoría de Gelo e de Tato. O Alfoz reaccionou e logrou igualar antes do descanso cos tantos de Manu Soto e Dani Jiménez. Ademais, os visitantes quedaron cun menos pola expulsión de Adri. 

Con todo previsiblemente a favor, o Alfoz non foi capaz de xerar as ocasións desexadas para conseguir a remontada. O Castroverde mantívose unido e tentou levar perigo ao contragolpe. Non obstante, foi a balón parado como marcou o terceiro cun remate de Noel.

Nun último arreón, os locais salvaron un punto nun saque de esquina. Dani Jiménez meteu o pé no medio de tantos dentro da área. 

Terceira vitoria seguida da Candelaria

O club da Rúa superou ao Celta Barreiros (1-2) na estrea coma local de Donato de adestrador. A Candelaria alcanza os 22 puntos e é 9ª. Con tres puntos menos sitúase na 10ª posición o Celta Barreiros. 

Tras unha primeira metade bastante trabada, o segundo acto estivo cheo de actividade. Primeiro aos visitantes anuláronlles un gol. Logo, si subiu ao marcador o primeiro de Manu Martínez. Despois teñen un penalti a favor que detivo Flavio. Máis tarde, quedaron cun xogador menos coa expulsión de Mista.  

A pesar de todo, Manu Martínez asinou o dobrete e encamiñou o partido. O dianteiro de Burela suma xa 16 goles no curso. Apertou o Celta Barreiros, pero resistíuselle o gol. Non foi ata os intres finais que Rocky lle marcou ao seu ex equipo. 

O Pastoricense empatou na Pontenova

O club da Pastoriza igualou a un gol na Mina. Remata a primeira volta con 19 puntos, a dez da praza de promoción de ascenso. A xeira é negativa, tras cinco encontros sen ganar en liga. 

Con cinco puntos menos atópase o Sporting Pontenova, que agora mesmo marcaría a zona de salvación. Conta cos mesmos puntos que o Casás e ten cinco de marxe co Castroverde. 

Encontro moi competido. Quizais cunha maior sensación de dominio dos locais no primeiro tempo, sen deixar que o rival se atopase cómodo coa posesión do balón. Aínda así, o vento tamén condicionou moito o xogo. 

No segundo tempo, o Sporting púxose por diante cun gol de Álex. O Pastoricense empatou no último tramo de partido por medio de Manel. 

O Casás superou ao Xermade

O conxunto capitalino venceu 4-1 ao cadro xermadés. Cuarto triunfo do curso que lle permite afastarse momentaneamente da zona de máis perigo. O Xermade mantense na zona media con 24 puntos e sen ter lonxe a promoción. 

Os locais foron superiores e realizaron un dos mellores partidos desta tempada. Marcaron rápido por medio de Noé e iso tamén lles beneficiou. Gran gol do lucense dende lonxe. 

No segundo tempo, o Xermade tivo o seu momento no primeiro cuarto de hora. Non o aproveitou e o Casás encamiñou o partido cun dobrete de Adrián Román. Recurtou diferenzas o Xermade por medio de Hugo, pero Juan sentenciou para os locais. 

O Becerreá campión de inverno no sur

Os pupilos preparados por Javi Gómez igualaron na súa visita ao Sober (1-1). Con todo finalizaron a primeira volta como líderes. Agora dispoñen dun punto de vantaxe con respecto ao Santa Comba, o seu rival tamén nos dezaseisavoz de final da Copa Deputación. 

O punto é moi importante para o Sober, que está nunha zona baixa moi igualada. Agora mesmo, dous equipos da Primeira Futgal poderían arrastrar para a Segunda sur, polo que cada punto conta. O cadro soberés é 12º con 14, empatado co Friol e só cun punto máis que Chantada B e O Páramo, este último en descenso directo. 

Xogo directo no primeiro tempo con poucos, pero achegamentos para os dous equipos. No segundo acto, o Sober comezou mellor, pero quen se adiantou foi o Becerreá. López marcou de penalti.

Os locais buscaron o empate. Agus fixo unha boa parada. David Piñeiro foi expulsado. Aínda así, Martín logrou o empate. O Sober defendeu os últimos minutos e sumou un punto ben aproveitado tal e como se deu o tamo final.

O Santa Comba venceu na estrea de Marino no Páramo

O conxunto da parroquia do mesmo nome gañoulle 3-2 a un Páramo que estreaba adestrador coa chegada de Marino. Os tres puntos permítenlle ao Santa Comba quedar só a un do líder e ampliar diferenza cos perseguidores: sete por riba do Ferreira e oito con respecto ao Lemos B e ao San Roque. 

O Páramo cae a posición de descenso directo, pero a competición está moi igualada na zona baixa. Ademais, entre os posibles arrastres, ninguén se pode despistar. 

Xocas volveu a portería do Ferreira para gañarlle ao San Lázaro

O Ferreira levou os tres puntos ante o San Lázaro (4-1) nun encontro no que volveu poñerse baixo paus o preparador de porteiros Xocas, debido a ausencia de Adri García por motivos laborais. É o oitavo triunfo do conxunto preparado por Manu Rodríguez, que queda a sete puntos da posición de promoción. 

Pola súa parte, o San Lázaro é o último clasificado con 9 puntos. Precisa aumentar o ritmo de puntuación na segunda fase do campionato para pelexar pola salvación, que agora mesmo estaría a cinco puntos. 

O Lemos B igualou co Paradela

O filial lemista empatou a un gol na casa co Paradela. O resultado provoca que baixe unha praza e quede agora a oito puntos do posto de promoción de ascenso. Mentres tanto, os visitantes soben ata a 10ª praza, con 19 puntos. Nestes momentos están en cifras de salvación. 

O San Roque non puido marcar ante unha Sarriana B que segue sumando

Non houbo goles en Montirón. O San Roque igualou 0-0 co filial da Sarriana e acumula cinco xornadas sen coñecer a vitoria. Mantense nos postos cabeceiros, pero máis afastado da zona de promoción, a oito puntos. 

Pola súa banda, a Sarriana B prosegue co seu bo facer en liga. Empate a domicilio para alcanzar as cinco xornadas invicta. 

O Antas levou o derbi

O duelo da Ulloa da categoría quedou en Antas, que venceu 3-2 ao Monterroso B. O resultado fai medrar na clasificación aos locais, que alcanzan a sexta posición con 23 puntos, catro máis que o filial monterrosino, que é 11º. A zona media tamén está moi igualada. 

O Portomarín volveu ao camiño da vitoria

Tras derrotas seguidas na liga, o Portomarín impúxose ao Chantada B (2-0) e logrou tres puntos moi importantes para afastarse máis da zona baixa. É 9º con 20 puntos. 

O filial chantadés rematou a primeira volta fóra do descenso directo (igualado co Páramo), pero agora mesmo a súa antepentúltima posición sería de descenso por arrastre. 

O Friol esperta: 3 vitorias nos últimos catro encontros

Triunfo pola mínima do Friol ante o Palas (0-1). Cuarta vitoria do curso que lle permite saír do descenso directo e colocarse con 14 puntos. Polo memento, a loita pola salvación segue sendo o obxectivo máis inminente, pero a visión xa é diferente ao lograr nove puntos dos últimos doce en xogo. O Palas queda con 20 puntos na zona media.