O mercado mantense moi vivo na provincia, con clubes que ultiman as súas fichaxes de cara a nova temporada. Achégase o comezo das pretemporadas, e con el a procura dos obxectivos que cada equipo presenta. Móvense as cartas tanto en categorías nacionais coma autonómicas, pero a misión é clara: converter a 25/26 nunha temporada para a lembranza.

É o caso da Sarriana, que suma ao seu proxecto na Segunda RFEF a Edu González (Gran Peña) e a Nacho Oliveira (Celta Xuvenil A) para engadir calidade ao seu cadro de xogadores e competir con garantías na nova categoría.

Na Primeira Futgal, o Guntín renova a Brais Barreira e a Rubén Seijas. Cumprirán así a súa quinta e cuarta temporada respectivamente no cadro do Ladairo, que seguirá adestrado por Germán Campos. Debasa marcha rumbo Outeiro de Rei, onde tamén xogará outro ex do Guntín, Francisco José Morado ‘Purri’.

O mercado da Primeira Futgal anda candente nos últimos días

Na zona norte, Xoel e Pichi continúan no Lourenzá e, no sur, o Escairón renova ao capitán Rubén Díaz e aos defensores Kevin Escobar e Tagüi. A metade de camiño, en Santaballa, Sergio Cazás xogará por segundo ano consecutivo na Liga, ao igual que Xesu.