Mantense movido o mercado nesta xornada de xoves, especialmente na zona norte da provincia. Julio Rengel (Tamaraceite) chega ao Viveiro para aportar experiencia logo de competir en Terceira RFEF en Castela e León e Andalucía. Na veciña Ribadeo e dous categorías abaixo, Criss non adestrará ao equipo por motivos persoais.

Desde o Ribadeo chega Migui ao Racing Villalbés ‘B’, que está moi activo no mercado e que se fai cos servizos de Iván Corbelle, formado na base do Castro e procedente do Pastoricense. Na capital, Marcos Sanfiz di adeus á portería da Cheda, polo que a Residencia terá que procurar unha competencia para Diego Bravos.

O mercado móvese moito nos bancos

Na Segunda Futgal, Juan Cortiñas renova nun Alfoz ao que chega o atacante Alex Solano (Rioaveso). E na Terceira, o Abadín anunciou a incorporación de Miguel del Río ‘Michi’ como adestrador, mentres que Carra será o seu segundo. O mediocentro Noé estará no Municipal por quinta campaña consecutiva, mentres que o defensor Pablo cumprirá a súa cuarta temporada. Tamén chega Paredes desde o Roupar e Alberto causa baixa logo de oito anos no club.

No veciño Catro Roldas renova o central Pepe, que completará así a súa segunda temporada no cadro logo de varias temporadas afastado do céspede. O focense Omar tamén continúa no proxecto chairego. O Roupar, pola súa banda, renova a Yosi.