Nova entrega do Diario dun Mercado, a sección estrela do verán. A Preferente concentra as primeiras novidades: o exgardamallas do Ribadeo Diego dos Santos, con pasado no Celta ‘B’ e no Marino de Luanco, será o novo preparador de porteiros do club mariñán. Pola súa banda, o Lemos asina ao dianteiro César, xogador e goleador no último All Star. Ademais, os seus veciños do Saviñao teñen novo adestrador tras o ascenso: Óscar Moure.
O resto dos movementos corresponden á Segunda Galicia. Na zona norte, o Sporting Pontenova renova a Adrián, Dany, Diego, Fran, Héctor, Marcos e Óscar, mentres que Bachir e Adrián Cube seguirán defendendo as cores do Iberia. No sur, o defensor Lucas renova no recén ascendido Rubián e Maza regresa ao Brollón tras o seu paso polo filial do Lemos.
O Guitiriz, moi activo no mercado
No Suso Cruz tamén ultiman os detalles de cara á nova temporada. Kiko Álvarez releva a Jose na presidencia do club, e Miguel Álvarez ‘Michel’ asume o cargo de adestrador e comezará a súa segunda etapa á fronte dos guitiricenses. O preparador, con experiencia como xogador en clubes como Logroñés , Dépor, Lugo, Endesa, Laracha ou Bergantiños, asume os mandos nunha temporada «de transición», con moitos xuvenís chamados a ser importantes no primeiro equipo.
