Coa temporada xa andando en Segunda RFEF, Terceira RFEF, Preferente e Primeira, e a piques de facelo en Segunda e Terceira Galicia, repasamos máis movimentos nos conxuntos lucenses.
O Escairón, que esta ano adestrará o ourensán Iván González, reforzouse maioritariamente no mercado da provincia veciña. O veterán defensor Josu, que militara no mítico CD Ourense e na SD Compostela en Segunda B, chega ao Saviñao para liderar a defensa desde o Atlético Arnoia. Do mesmo conxunto chega Roca. Para o gol chega ao Municipal o atacante Rucho, procedente do Melias.
Sen saír da Primeira Galicia, o CD Foz refórzase co mediocentro Del Viso, procedente do Ribadeo, conxunto no que militou a pasada temporada na Preferente. O Guitiriz anunciou a fichaxe do José López ‘Josiño‘. O de Outeiro de Rei conta cunha dilatada traxectoria no fútbol sala, chegando a xogar en Primeira División nas filas do Prone. O Vilalba FS e o Outeiro FS foron outros dos seus equipos.
No Riotorto militará Adri, xogador de ataque que chega desde o Guntín, así como Adri Rodríguez, zagueiro procedente do Portomarín. O colombiano Cristian reforza o ataque dos de Manolo García, procedente do Valencia Patriotas.
Na Segunda Galicia, o Abadín, adestrado este ano polo ex do Catro Roldas David Lorenzo, asinou a Cendán e Rubén procedentes ámbolos dous do xuvenil do Cospeito, así como a Noé González, que chega desde o Castro B.
No Alfoz xogará Jose, atacante procedente do Foz, así como os centrocampistas Alexis, que chega do Celta Barreiros e Vini, do Nuevo Nausti.
