Achegámonos a setembro, pero o mercado aínda se mantén activo. Os clubes ultiman os seus movementos de cara a nova temporada. É o caso do CD Barco, onde podería xogar o lucense Álex Rey, segundo indican desde Non Vale Furar. Enfrontaríase así ao seu irmán, Javi Rey, que goza dun momento dulce no Racing Villalbés.

Outro equipo da Terceira RFEF, o Viveiro, incorpora ao atacante Arona Sané. O senegalés, que chega desde o Alondras, debutou en Primeira División coa camisola do Atlético de Madrid. Tamén na Mariña, o Xove Lago ficha a Mario Gómez, que chega desde o veciño Folgueiro para reforzar aos verdes na Primeira Galicia.

Tamén é época de cambio en Monterroso. O filial de Cerdeiriños será dirixido por Javitxu, ata agora delegado do Portomarín, e por Gontá, xogador do primeiro equipo que botará unha man no equipo ‘B’. Pero o máis sorprendente é que Víctor Valiño ‘Valigol’ non vestirá a camisola do Monterroso este ano: o dianteiro é o novo reforzo do Relámpago Taboada.

Por último, confírmase a emigración de Diana Picos. A ex-dianteira do Carballedo move os marcos para xogar no Bandeira, do concello de Silleda.