O mercado está na súa recta final co inicio das pretempadas en moitos dos equipos do fútbol lucense. A falta de 12 episodios para que o Diario dun Mercado de Futbolinlugo alcance o medio millar de edicións, un fito histórico. Nesta ocasión, os bancos da Primeira Futgal xa están ocupados, as retiradas e os regresos teñen os seus propios capítulos e moitos movementos revolucionan moitos dos equipos.

O adestrador que faltaba na Primeira Futgal

O banquillo do Ribadeo xa está ocupado despois de que Criss tivera que renunciar ao cargo antes de estrealo. A opción pola que opta o conxunto da mariña é a fichaxe do vegadense Diego Bermúdez. A súa historia é moi curiosa debido a que ata o de agora exercía de analista na selección de Uruguai. Isto acontece debido a que o seleccionador é Marcelo Bielsa, que o leva despois do seu traballo conxunto en Inglaterra no Leeds United.

Retiradas e regresos

É tempo para a tristeza que dan as retiradas, e máis cando son tan prematuras como a do gardameta soberino Ramón Rodríguez. As lesións interpuxéronse no camiño do porteiro de 26 anos que será recordado como unha lenda en Ourense, onde acadou un ascenso de Preferente a Terceira RFEF. O gardameta suma 58 partidos en Terceira RFEF e 86 na Preferente.

O fútbol tamén ten unha cara feliz coas voltas a equipos nos que xogadores e xogadoras foron grandes. Nestes caso, é a de Iria Pérez, que regresa á SD Chantada. A xogadora All Star regresa ao club da súa vila tras xogar as últimas tres temporadas no CD Lugo e ser unha das súas xogadoras de referencia.