Cada día, o mercado do fútbol lucense é máis imparable, con movementos que se realizan por todas as partes da provincia con pezas que comezan a saber a camisola que vestiran na vindeira tempada. Nunha nova edición do Diario de Futbolinlugo recollemos bancos que se moven, xogadores que se manteñen, retiradas das que doen e marchas e fichaxes que provocan sismos nos diferentes proxectos que se establecen en Lugo.

Porterías sen dono

As grandes sorpresas deste diario chegan nas porterías. O Burela regresa a Preferente, pero queda sen os seus dous porteiros habituais das últimas campañas. Simón e Kiko Mariño aparcan o fútbol a pesares do ascenso. O ascenso desde a Primeira Futgal acadárono ante o Chantada Atlético, que tamén ve como no Sangoñedo haberá un cambio de ciclo na súa meta co adeus de Ivi Casillas despois de catro tempadas dentro da institución.

Non todo o referido aos porteiros son malas noticias. O Iberia tivo unha alegría ao completar este posto coa fichaxe de Iker. O ribadense procede do Vegadeo, pero xa coincidiu con Moro no Sporting Pontenova. Tócalle agora intentar gañarse o posto nun equipo en estado de felicidade despois do seu ascenso á Primeira Futgal.

Un mercado de regresos e renovacións

O mercado deixa regresos nos bancos do fútbol lucense. Jony Lombardía será o novo adestrador do primeiro equipo da Piringalla despois de que Andrés Rodríguez deixase o proxecto sénior para dirixir ao xuvenil A do club, que está na procura dunha praza na próxima Liga Galega. O técnico regresa á entidade capitalina despois de dúas tempadas no Páramo onde conseguiu ascender e manter ao equipo na Segunda Futgal Sur.