A Preferente Norte está cada ano máis igualada e todos os equipos buscan a forma de mellorar os seus resultados para acadar os seus obxectivos. É por iso que moitos buscan facerse con novas pezas que lles permitan dar un paso cara adiante. É o caso do Sigüeiro, colista que suma cinco puntos e aínda non coñece a vitoria. Ante a súa situación, hai dúas xornadas acudiron ao mercado para facerse cun dos grandes nomes dos bancos lucenses, Brais Prados.

O técnico de Outeiro de Rei sumou un punto a semana pasada no seu encontro ante o Dubra e ten claro en que o obxectivo do Sigüeiro é voltar ao camiño que lle permitiu na tempada pasada situarse nos cinco primeiro, aínda que neste caso sexa para salvar a categoría. O dianteiro pasouse polos micrófonos do Ser Deportivos Lugo desta semana e enfrontouse ás preguntas de Álex Gato, presentador do programa, e Eros López, redactor de Futbolinlugo.

Entrevista ao técnico do Sigüeiro Brais Prados

Oportunidade: «O Sigüeiro tivo un inicio de tempada complicado. Unha vez abandona Diego Armando García o proxecto, chégame a oferta por parte de Vecho. Tiña ganas de voltar a adestrar e o proxecto convenceume. Agora xa estamos loitando para conseguir remontar esta situación».

Situación parecida á do Escairón: «O semellante é a posición, xa que ambos queren saír do descenso. A diferencia é grande tanto en tempo, xa que chego en novembro, como a nivel de club. Hai unha estrutura na que temos moitas facilidades, mentres que en Escairón era difícil polo seu contexto. O ano pasado había equipos moi destacados, pero esta tempada está todo máis cohesionado e a diferencia vai estar nos adestramentos e o traballo diario».

Cadro de xogadores: «Están nunha situación anímica difícil porque teñen unha losa importante ao non acadar a primeira vitoria do curso. Pero teñen unha gran predisposición para traballar e mellorar, así que penso que a vitoria está moi preto».

Hugo Rama: «É un pracer contar con el nos adestramentos e é un exemplo para os rapaces. Estamos encantados con el, pero temos contextos diferentes e polo de agora o que temos que facer é desfrutar da súa axuda día a día».