O Antas xa coñece o calendario para volver, dúas temporadas despois, á Primeira División Galega. A liga estará patrocinada, por cuarta campaña consecutiva, pola Denominación de Orixe Protexida (DOP) Arzúa-Ulloa, que promove e garantiza a calidade na elaboración do queixo do mesmo nome.

Esta DOP ten unha gran implantación na zona centro de Galicia. Abrangue concellos das provincias de Lugo, A Coruña e Pontevedra. Con todo, o único equipo que vai militar este ano en Primeira de todo ese territorio é o Antas.

O conxunto do Castro Seoane é o único representante do fútbol feminino lucense nesta división, que ten por riba á 3ª RFEF, o cuarto chanzo do fútbol feminino español. A categoría viuse influenciada pola reestruturación da Terceira e varios dos equipos punteiro do curso anterior subiron a esta 3ª que pasa a estar integrada por equipos galegos.

As viaxes principais do Antas, á Coruña

O Antas concentrará a súa actividade como visitante na provincia da Coruña. Terá sete desprazamentos á contorna da área metropolitana coruñesa: Orzán B, Vitoria B, Pastoriza, Atlético San Pedro, SP Burgo, SP Cambre e Carral. Ademais dos desprazamentos á zona de Santiago (Victoria FC B e Calo) e ao concello de Santa Comba (Xallas).

Na provincia de Pontevedra visitará tres equipos e os tres filiais: Atlético Villalonga B (Sanxenxo), Sárdoma B (Vigo) e Lóstrego B (Gondomar). O Arenteiro de Carballiño e o EFF Rosalía da cidade de Ourense completan a competición de 16 equipos.

O primeiro clasificado ascende directamente á Terceira Federación. O segundo e o terceiro xogan unha promoción de ascenso entre eles para levar outra praza de subida a cuarta categoría do fútbol feminino español. Pola contra, os dous últimos clasificados descenderán á Segunda Galega.

A competición non remata ata a última finde de maio

A Primeira Galega comeza a fin de semana do 21 de setembro. De entrada, están prognosticadas tres fins de semana de parón pola celebración do Campionato de España de Seleccións Autonómicas Sub 16.

A liga vai de seguido ata a segunda semana de decembro (13 e 14). Retomaríase antes do Nadal (20 e 21) para deixar xogadas 12 xornadas antes do ano novo.

En 2026, hai competición todas as semanas (Entroido incluído) ata a segunda de marzo (14 e 15) que volve haber outro parón. Celebraranse dúas xornadas máis e descansarase en Semana Santa (primeira semana de abril).

Logo, continúa ata a segunda de maio, terceiro parón (9 e 10), para despois afrontar o tramo final das últimas tres xornadas. As primeiras findes de xuño xogaríase a promoción de ascenso.

O Antas recibe ao Calo na finde do San Miguel de Monterroso

A primeira xornada, o Antas xogará coma visitante en campo de herba artificial, no Dani Mallo, ante o Sporting Cambre. Na segunda, chegará a estrea na casa, nunha fin de semana de importancia para a comarca da Ulloa ao celebrarse as festas do San Miguel de Monterroso. Ese encontro xogarano ante o Calo, de Teo, que pelexou pola salvación e logrouna o curso anterior.

O Antas finalizará a liga fóra da casa. Visitará na última xornada ao EFF Rosalía, outro dos clubs recén ascendidos.

Consulta o calendario completo

Foto de portada: Óscar Pérez, secretario do Consello Regulador Arzúa-Ulloa DOP; Pablo Prieto, presidente da Real Federación Galega de Fútbol; e Luis Lamas, presidente do Consello Regulador Arzúa-Ulloa DOP. Autoría: Futgal