Racing Vilalbés e Sarriana enfrontáronse na Madalena na ida da semifinal do play off de ascenso a Segunda RFEF nun encontro no que ámbolos conxuntos foron moi recoñecibles no seu fútbol, pero que desnivelou un solitario tanto de Álex Millán preto do ecuador do segundo tempo.

O comezo do encontro evidenciou a prudencia de ámbolos conxuntos. Nin locais nin visitantes queixeron correr riscos de ningún tipo no que xa se presumía unha eliminatoria moi parella. A Sarriana chegou á área rival en máis ocasións no primeiro cuarto de hora, aínda que sen chegar a inquedar de xeito serio a Álex Santomé. O gardameta chairego tivo que deter dous lanzamentos de Sané e Álex Millán que non lle causaron apuros.

Co transcurso dos minutos os de Alberto López gañaron en confianza reafirmados no seu obxectivo de manter a portería a cero e preto do intermedio gozaron das mellores ocasións do primeiro tempo. As dúas primeiras saíron do ‘guante‘ de Cañi. Primeiro nun saque de falta que rematou Edgar preto do pao e pouco despois tras un bo servizo a Jose Varela que o central Maxi salvou cando o balón se encamiñaba cara a rede. Buyo, moi incisivo pola banda esquerda, puxo a proba ao debutante na portería Pirot.

O segundo tempo seguiu un guión moi semellante ao primeiro. O cadro visitante saiu con máis intención de chegar á área contraria, pero neste periodo final fíxoo con máis claridade. Álex Santomé realizou unha parada de gran mérito nun lanzamento de falta de Martín e pouco despois Maxi cabeceou alto cando xa se cantaba o gol. Este chegou pouco máis tarde. Azael ollou o desmarque de Sané e o extremo conectou un potente disparo que Álex Santomé rexeitou, pero o balón quedou morto na área pequena para que Álex Millán enviara ao fondo da portería.