A Sarriana B conseguiu gañar ao Corgo na súa eliminatoria polo ascenso na final do playoff do Grupo Sur da Terceira Futgal. No seu segundo ano como equipo en activo, o filial sarriao conseguiu un ascenso co que non contaban nun inicio. Un proxecto a longo prazo que busca dous obxectivos claros, axudar ao primeiro equipo no desenvolvemento de diferentes xogadores que poidan axudar nun futuro e medrar a través do que se produce na canteira.

Unha eliminatoria moi competida

A Sarriana B chegou con certa vantaxe ao partido de volta, xa que na Ribela gañaron por 3-1. Raúl Fernández, adestrador do filial, afirma que «o Corgo era un rival que no gustaba polo seu xogo. Tiña claro que o noso equipo no playoff podía competir e que a importancia do partido de Ribela era moi grande. Tivemos opcións de poder matar a eliminatoria e démoslles vida. Sabíamos que a volta era un encontro durísimo porque co seu fútbol directo podíanos facer moito daño».

E o partido de volta foi tan intenso no futbolístico como semellaba. Aínda que puxeron o primeiro gol do encontro tras un penalti ao panenka de Dani Vázquez, o Corgo foi capaz de poñerse a un gol de empatar a eliminatoria a falta de vinte minutos para o final do encontro. A Sarriana B mostrou a súa capacidade de competir nun playoff e, cun gol no 98 de Saúl, pecharon o seu ascenso á Segunda Futgal na súa primeira promoción

O grupo, a chave da Sarriana B

En toda a tempada destacou unha cousa na Sarriana B, o grupo que formaron. «O ascenso é merecido porque demostramos do que eramos capaces cun futbol moi grande de competir. Temos un grupo humano espectacular e todos os xogadores sumaron. Cando un equipo está unido todo contribúe», afirmou Raúl.