A unha semana para o comezo da Preferente, os clubes lucenses ultiman a súa preparación para unha categoría que se agarda esixente e que presenta novidades con respecto a outros anos. A primeira delas, a escisión da provincia: Burela e Pol competirán no Grupo Norte, mentres que o Lemos terá que viaxar polo Sur de Galicia.

Lugo terá representación na Preferente Norte e Sur

O recén ascendido Burela quere consolidarse na categoría. Co descenso da Preferente do Ribadeo, os da Marosa álzanse como o único representante dunha comarca moi futboleira. Oke optou pola renovación da xente da casa, que leva anos no club e que sinte as cores do Burela. O club continuará capitaneado dentro e fóra do verde por un Jairo Campo que é a cabeza visible dun proxecto que convence moito.

Así, A Marosa vestirase de gala o vindeiro domingo para recibir ao Sigüeiro, filial da SD Compostela. Na segunda xornada, os verdes visitarán o feudo do Dubra. As primeiras xornadas serán importantes para coller confianza, entrar nunha boa dinámica e medrar paseniño dentro da categoría. O crecemento debe ser lento, pero seguro, para que o Burela poda continuar con este fermoso camiño.

O caso do Pol é diferente. Logo de asentarse na categoría cunha gran temporada, o cadro dirixido por Ramón Labrada mira cara arriba. As fichaxes chegadas desde a Terceira RFEF e a renovación de pezas moi importantes poden convertir aos do Municipal nun dos rivais a bater nesta Preferente. A conxugación das novas pezas cos veteráns do grupo será un elemento decisivo para conseguilo.

Os vermellos visitarán ao Victoria na sempre complicada Grela para estrearse nesta 25/26, e recibirán ao Val de Narón na segunda xornada. A finais de setembro, na cuarta xornada, recibirán ao Burela para vivir o primeiro derbi lucense do curso. O segundo terá lugar no ano 2026, na segunda fin de semana de febreiro.

Na Pinguela, as cousas son distintas. A incertidume que rodea o Grupo no que o Lemos quedou encadrado non permite falar de máis obxectivos que a permanencia. Porén, o cadro que dirixe Edu reforzouse ben no mercado estival e non quere pasar apuros. Para comezar a temporada, recibirán ao Choco na cidade do Cabe. Unha semana despois, os lemistas visitarán O Porriño.

As primeiras xornadas desta Preferente Sur serán chave para entrar nunha dinámica positiva, que permita coller boas sensacións e facer do Club Lemos, paseniño, un club envidiado e referente na súa comarca.